【網店變實體工廈創業 90後靠千層蛋糕成功響朵】Holam Bakery、Call Me Chef

千層蛋糕一直好受歡迎,由Lady乜襲港之後更加掀起千層旋風添啦!喺觀塘駱駝漆大廈就咁啱有兩位90後少男少女,兩人各自嘅小店,都可以話係千層蛋糕創業史。等小編走訪兩間唔同舖頭,睇吓有咩好介紹啦!

 

IG人氣勁    Holam Bakery

第一批喺IG闖出名堂嘅千層蛋糕店Holam Bakery,喺網上累積咗四年人氣再進擊成為實體店一年多,背後只係一位90後小男生Holam主理。年紀輕輕想創一番事業唔係靠父蔭,Holam一邊兼職一邊儲錢,將半工讀時儲落嘅錢,以三十幾萬實行創業大計。Holam Bakery一直以千層蛋糕為主打,嚟緊會開發多啲方向,例如生日蛋糕、散水餅、派對活動等等添。

Holam Bakery一直以千層蛋糕為主打,特別著重奶味。為咗令客人食得健康啲,所以煎皮時唔落油,咁食每件都有18層班戟皮嘅千層蛋糕都冇咁罪惡感。千層蛋糕每層之間滿滿嘅忌廉質地幾厚身,打得好實但食落依然幼滑。仲有價錢好親民,HKD28起就有交易喇!呢度可以堂食、外賣同交收,小編當然即場試啦!

抹茶流心(HKD34),抹茶流心程度唔算好澎拜,味道微甜,慢慢會有回甘嘅感覺。

玫瑰千層蛋糕(HKD32)係清新啲嘅款式,食落有淡淡嘅玫瑰花香滲出嚟,仲有陣微甜嘅蜂蜜味添,啱晒怕太甜嘅朋友仔。

伯爵茶千層蛋糕(HKD32)係少女們鍾意嘅口味之一,伯爵茶味道幾濃郁㗎。

焦糖咖啡(HKD32)咖啡味幾強,蓋過咗焦糖味,不過鍾意飲咖啡的話應該都鍾意呢款。

呢度仲有雙拼口味嘅”MIX”系列,好似香芋MIX牛乳千層蛋糕(HKD34),奶味幾重,香芋味相對淡啲。

奶蓋Oreo千層蛋糕(HKD240/6吋)奶蓋稠度啱啱好;Oreo碎唔係好多 ,啱啲想有Oreo但怕太甜嘅朋友仔。

 

Holam Bakery
地址:觀塘開源道60號駱駝漆大廈3座4樓I室
電話:6335 7901
營業時間:星期一至日:12:00-19:30

 

藍帶女廚    Call Me Chef

Call Me Chef嘅老闆係一位90後小女生Vonnie,同樣由網店起家做咗兩年,今年年初就轉做實體店。不過唔係開食店,而係做workshop,開班教人整蛋糕同交收訂好嘅客製化蛋糕。七十幾萬嘅投資對Vonnie都唔少,雖然廿歲出頭,但已經喺藍帶廚藝學校曼谷分校,讀完為期9至10個月嘅藍帶課程,仲係三甲畢業添,所以開班授徒絕對冇問題。學費大約HKD400,價錢好合理。

為咗堅持質素,試過趕起散水餅同百日宴蛋糕,只可以瞓一至兩個鐘就繼續趕工,甚至生日都喺餅房渡過。以前會主力於千層蛋糕,但最近推出嘅戚風蛋糕都好受歡迎,銷量甚至同千層蛋糕差唔多,有時出快閃團仲會極速秒清添!

韓式裱花加生果咖啡味千層蛋糕(HKD260/6吋)嘅咖啡味突出,每個千層蛋糕需要20塊人手製作嘅餅皮,每塊餅皮之嘅忌廉厚度適中,再用水果鋪上面做裝飾,靚到做生日蛋糕都得喎。

Vonnie不斷自創新口味,依家已經有幾十種口味,例如日本抹茶、芒果、葡萄冧酒、港式奶茶等等,而焦糖脆脆奶蓋戚風蛋糕(HKD220/6吋)係近期其中一個新研發嘅款式。

設計概念嚟自港人喜愛嘅奶蓋茶,不過佢嘅做法比較輕盈,主打低脂、低油同低糖。奶蓋流心程度澎拜,味道微甜,食落非常厚同滑身,加埋焦糖脆脆一齊食口感好豐富。最重要係戚風蛋糕非常軟熟,放入雪櫃第二日再食都仲保持到新鮮嘅感覺。

 

Call Me Chef
地址:觀塘駱駝漆大廈三座12樓J室
電話:6225 4451(WhatsApp)
營業時間:從缺(不定時休息)

You may also like...

Leave a Reply

Your email address will not be published. Required fields are marked *