【深水埗平民西餐CP值極高 $35海量意粉餐大碟好味】平霸 

話說平霸行經深水埗見到呢間餐廳Majesty,見到餐牌上面一個意粉只係30幾蚊,心諗會唔會係細細份、食唔飽嗰啲,再望吓舖頭入面,見到有食客竟然要兩、三個人Share一份先食得晒喎!唔係啩?有冇大碟成咁?平霸決定入去試吓!

平價意粉原來唔止做下午茶時段或者午市時段,竟然係全日供應!30幾蚊食到大大碟分量十足嘅晚餐,真係可遇不可求喇!不過,店主就話只有堂食先會咁大碟,外賣係細份啲嘅,所以大家想食大大碟意粉,記住留定肚喺度堂食喇。放心,食唔晒都可以帶走,唔好浪費食物吖嘛!

餐廳係自助形式嘅,要自己去櫃台落單同俾錢,再攞個號碼牌返去等侍應送餐。

枱面係冇餐具餐紙提供,客人要自己喺餐具處度攞餐具。平霸就覺得擺餐具嘅位置擺得有少少亂,有啲細碟都幾污糟吓,呢一點餐廳要留意吓啦!

意粉即叫即炒,大概等咗十分鐘左右,羅勒鮮茄煙肉意粉(連紅茶HKD35)送到啦,意粉一放低就聞到好濃嘅蕃茄味,成個意粉真係堆到成座山咁高,唔止意粉,連煙肉同蕃茄嘅分量都好多,35蚊仲要包埋飲品,真係超抵食!食落蕃茄味好濃,酸酸甜甜幾開胃,蒜味仲好突出;而意粉嘅軟硬度適中,煙肉冇咩特別,但就唔係好覺有羅勒味!不過35蚊有咁嘅質素好滿意喇,性價比好高呀!

另外,香蒜白酒蜆肉意粉(連紅茶HKD35)係另一個超值之選。意粉一樣係咁大碟,而蜆肉嘅分量亦非常之多,幾乎啖啖都有蜆肉。雖然啲蜆唔係連殼上,只係急凍蜆肉,但係食落都冇乜雪藏味。成個意粉嘅蒜味真係幾重,好有蒜香。

每個套餐都會配一杯熱紅茶(跟餐飲品),雖然冇得免費轉其他飲品,但係呢杯熱紅茶都冇揸流攤㗎,幾大杯,而且每杯都會放一個紅茶包,唔係茶記嗰啲淡到無味嘅紅茶。歎完意粉再飲杯熱紅茶就冇咁膩喇!

餐廳入面有個角落放咗堆書俾客人隨意拎嚟睇。餐廳職員唔會見你食完,就催你走,嗌多杯嘢飲坐多陣,喺度睇吓書、chill吓又得,環境幾舒適。

 

平霸小評:平日去餐廳食個飯閒閒哋都要四、五十蚊先落到樓,平霸睇見三十幾蚊一個意粉餐已經覺得好抵食,估唔到仲要大碟又足料,仲配埋跟餐飲品添。想食餐好嘅,唔一定要貴嘢㗎,呢次真係平民價錢食到高質意粉喇,抵到爛!

 

Majesty
地址:深水埗福華街15號地舖
電話:6171 7174
營業時間:星期一至日:11:30-22:30

You may also like...

Leave a Reply

Your email address will not be published. Required fields are marked *