【灣仔新開豬雜店好旺場 懷舊銀針粉豬油撈飯吸客】元朗合隆潮洲粉麵

小編發現灣仔新開咗間元朗合隆潮洲粉麵喎!喺灣仔地頭又叫元朗,係咪即係分店呢?不過小編又唔覺元朗有間粉麵舖叫合隆喎!原來老闆之所以改呢個名,只係想紀念50年代喺元朗開冰室嘅爸爸啫!小編聽聞平日下午茶時段都好旺場,今次一於為大家試吓味啦!



現場所見一人一碗豬雜咁滯,個個都食得好滋味咁喎;銀針粉亦係唔少人嘅「飛弗」,可能因為出面唔係咁多舖頭做啩。


價錢其實喺灣仔嚟講都算幾公道,粉麵單拼29蚊就有交易、三拼都唔過40蚊,有成20款配料任君選擇。除咗出名嘅豬雜之外仲有好多其他選擇,黑豚肉餃同埋花雕醉雞翼(HKD20)都好多人叫㗎!花雕香味十足,讚!

食完小食就到主角喇,小編叫咗一個黑豚肉餃銀針粉(HKD29/單拼)。銀針粉又名老鼠粉,相傳係因為以前製麵師傅唔想浪費製麵時剩低嘅頭頭尾尾,於是做出咗銀針粉。因為形狀似老鼠尾巴,所以又名老鼠粉。細細個大家去茶樓應該都成日食銀針粉,但唔知由幾時開始銀針粉就慢慢絕跡喇。講返呢度嘅銀針粉味道如何先,配上湯嘅粉略嫌有少少清淡,不過舖內有自家製茶脯可以調味,大家食辣嘅話不妨一試。粉質比想像中結實,食得出童年嘅味道,唔錯。

至於黑豚肉餃方面,造型有啲似平時超市賣嘅肉燕餃,不過咬落就feel到係自家製味道,豚肉味香濃不膩,皮薄餡靚。咬落啖啖都係肉香,唔怪得大家咁捧場啦。

另外豬油撈飯(HKD42/三拼)亦係唔少人慕名拜訪嘅招牌,同銀針粉一樣,豬油撈飯同樣係差唔多絕跡嘅懷舊食物之一。舊時嘅草根階層嘅人因為唔係成日有肉食,所以就以豬油代替餸菜,將肥豬肉炸成油後急凍,每次食飯拎一粒仔出嚟加熱拌豉油撈飯。今時今日物質咁豐富嘅香港,已經唔會再有人喺屋企整豬油撈飯咯!小編覺得呢度嘅豬油撈飯食到嘅係一種單純嘅美味,豬油加豉油好廉價,但每食一啖都想再食下一啖。未食過嘅朋友值得一試呀。

呢度豬雜咁出名當然要試啦,侍應阿姐就介紹小編試豬大腸豬肉青同埋自家製魚片頭,話呢幾樣餸都好受歡迎喎!呢度嘅大腸望落好似好清淡,食落頗具油香,質地鮮嫩。

豬肉青其實就係我哋成日食嘅豬頸肉,咬落爽口得嚟有肉香,加埋上湯嘅清爽感,一啲都唔膩。

一睇就知佢唔係現成買返嚟賣嘅魚片頭,魚片頭每嚿形狀都不一,咬落爽口彈牙,大嚿夾抵食。

元朗合隆潮洲粉麵
地址:灣仔德仁街3號A舖
電話:2889 1618
營業時間:星期一至日:10:30-21:00

You may also like...

Leave a Reply

Your email address will not be published. Required fields are marked *