【鐵板餐冇鐵板變膠碟上枱 食客報海關大家樂補鑊】食焦

鐵板餐冇鐵板係咩玩法呢?仲要個原因係因為間舖細,所以唔用鐵板上?呢個原因真係令人搲晒頭喎!大家樂嘅鐵板餐咁耐歷史,其實係唔少人嘅童年回憶添㗎,唔用鐵板上變咗做膠碟餐就真係完全唔係嗰回事啦!

理想圖是咁的。 (連登圖片)

現實圖是咁的。 (連登圖片)

理想與現實相差太遠,話說有網民去咗日出康城間大家樂分店,諗住食返個鐵板餐,點知換來膠碟餐,「早幾日係康城間大家樂食鐵板餐,夠膽死鐵板都無個,就咁俾隻膠碟你上,D肉就半暖,D汁同菜就凍,好難食……」最令人接受唔到嘅係廚房師傅嘅說法,「同個廚房講,佢竟然答我:因為間鋪太細,所以無鐵板,仲同我講有唔滿意就一係退錢一係換過第二樣……」

最估佢唔到應該都係冇鐵板,竟然係因為間舖太細,其實關乜事?(連登截圖)

餐牌大大隻字係鐵板餐嚟㗎! (連登圖片)

依家喺大家樂食個鐵板餐要成70蚊,冇鐵板上仲要咁難食,事主梗係嬲豬啦,難得嘅係事主老竇識得苦中作樂,仲同事主講「我老豆仲叫我當係all day breakfast咁食個觀感就fit晒!」不過事主都係氣難下,send咗投訴信去海關、消委會同大家樂,睇吓有冇違反商品說明條例!

渣渣聲真係好重要囉! (連登截圖)

遲啲可以乜都冇,都係因為間舖太細! (連登截圖)

有唔少網友質疑點解事主唔退錢喎! (連登截圖)

未收到大家樂回覆,但係事主經過「膠碟大家樂」嗰陣,發現原先餐牌上嘅鐵板餐,已經下咗架喇,偷龍轉鳳換咗個「滋味扒餐」,即係冇鐵板嘅!而事主之後就收到大家樂嘅官方回覆喇,都係好官腔咁話,其實康城店一直都係冇鐵板餐嘅,只係嗰日員工疏忽上咗鐵板餐牌喎,跟住都有耍晒冧道歉嘅!咁大家以後要識路喇,要食真.鐵板餐,唔好再去康城大家樂喇!

靜雞雞改咗做「滋味扒餐」,消失的鐵板呀! (連登圖片)

真.官方回應!大家收唔收貨呢?(連登截圖)

You may also like...

Leave a Reply

Your email address will not be published. Required fields are marked *