【最新打卡潮!素食者都啱! 潑墨式奶蓋茶文青感爆發】茶墨

飲珍奶已經成為唔少香港人嘅Daily Routine之一 ,不過每次飲親都有啲罪惡感㗎!今次小編介紹呢間本地薑茶墨就反其道而行,Sell健康喎,自家製嘅堅果奶蓋完全冇蛋、奶呢兩種成份,好處除咗卡路里偏低之外,最重要嘅係連純素食者都飲得!夠晒friendly!

舖頭開喺THE ONE四樓,整體style走日式簡約風,Logo就採用咗中國傳統嘅書法設計。據店員講,原來老闆係一位設計師,難怪舖頭格局到飲品外觀設計都咁吸睛啦!

點解會叫做茶墨呢?原來係源於佢哋招牌嘅「墨」系列,呢個系列總共有4個選擇,每款杯身都會用自家製堅果奶蓋製成「潑墨」效果,打卡一流㗎!

一聽到「墨」,大家應該立即聯想到黑色啦!呢杯就係茶墨最signature嘅黑芝麻烏龍麻糬鮮奶(HKD36),芝麻糊大家都有食過,但係芝麻mix烏龍又好似冇乜試過喎!因乜解究芝麻烏龍又要加麻糬呢?原來係因為老闆覺得大家成日食珍珠都食到厭啦,而佢覺得日式麻糬同芝麻味道好夾,希望大家多啲珍珠以外嘅選擇!

芝麻味香濃,加埋烏龍茶底令到成件事更加fresh,麻糬Q軟彈牙,細細粒幾有咬口。全店飲品嘅甜度全部都default咗係50%,老闆話有時飲品太甜反而會失卻咗原味。又真係喎,呢杯好似係小編飲過最唔甜嘅一杯手搖飲品,感覺意外地清新,起碼一路飲真係一啲罪惡感都冇,飲完唔會飽飽滯滯先啦。

另外紫薯鐵觀音堅果奶蓋(HKD42),40蚊杯奶蓋聽落好似貴咗少少,不過正如小編頭先提過,奶蓋用咗原材料係堅果奶,成杯比起普遍芝士奶蓋高,重點係連純素者都飲得!真係素食者福音呀,始終市面上純素茶飲選擇真係唔算多!大家飲嘅時候可以先飲一啖奶蓋,奶蓋雖然冇用蛋同奶,但味道其實都幾香濃,夾埋半糖嘅新鮮紫薯鐵觀音茶,飽肚之選!

另外「潑墨」花紋真係幾靚喎,同埋都算last到好耐,可以俾大家慢慢影靚相打卡!店內有個座枱小屏風專為大家打卡而設,真係好貼心呀!

如果大家想飲水果茶嘅話,可以試吓火龍果鐵觀音堅果奶蓋(HKD42)。奶蓋加埋火龍果清爽唔膩,水果茶控必試呀!

店員話玄米抹茶都係得意之作,呢杯麻糬玄米抹茶鮮奶(HKD36)用來自日本嘅抹茶粉,即叫即喺你面前磨,製作超認真呀!抹茶茶味甘香濃郁,甜度依然係預設咗半糖,嗜甜嘅朋友仔可以同店員要求調整甜度。不過小編就覺得間唔中飲吓半糖其實都唔錯吖,太甜反而浪費咗啲來自日本嘅抹茶粉呀!夾埋麻糬粒粒真係好似喺日本食緊日式甜品,唔膩之餘仲有啲消滯,抹茶控咪錯過喇!

另外仲有自家製爆谷,不定期會轉唔同嘅新口味㗎!今次係抹茶爆谷(HKD30),小編就覺得茶味都幾夠濃,可以揀堂食杯裝或者紙袋Take away,可以一試呀!

茶墨 Tea Brush
地址:尖沙咀彌敦道100號THE ONE 4樓411號鋪
電話:7072 1138
營業時間:星期一至日:11:00-22:00

You may also like...

Leave a Reply

Your email address will not be published. Required fields are marked *