【健康飯盒達人教路 「天然顏色愈豐富就愈好!」】懶健康貼士

人人都話要食得健康啲,但要實行起上嚟唔係個個堅持到,因為冇乜人抵得住長期食得清淡呢!不過Health Box嘅負責人Jess就話呢個觀念要改喇,因為佢讀完Food and Nutrition之後,對炮製健康飯盒有更透徹嘅理解。聽吓佢點講啦!

「以前我唔會知道每種食物嘅成分同益處係咩,但依家我明白身體嘅功能點運作、人類生物學又係點、食物成分等等,食幾多會帶嚟咩影響。所以當我讀完營養之後,對發展健康飯盒好有幫助,亦都更加專業。因為我哋嘅食譜係基於食物營養,亦可以幫助大家喺食美食嘅同時達到想健康、keep fit、增加肌肉等等效果。」

「節食」都有謬誤!

好多時大家都覺得節食就係「食少啲等於瘦」,但其實係錯。喺營養學之中,「節食」指80%關於我哋食嘅嘢,20%係運動。所以減肥需要食啱嘅食物、啱嘅分量配合正確嘅運動。我亦睇到另一個關於增加肌肉嘅誤點,好多人會食過度或過度消耗蛋白質。其實身體每日只能夠吸收一定分量嘅蛋白質,食咗過多嘅肉同其他蛋白質,會轉化為脂肪儲存喺體內,或者變成廢物排出體外。所以食得太多反而可能導致體重增加,令腎臟負擔增加同便秘添。

每天應攝取幾多蛋白質?

體重(kg)×0.8,如果以55kg嘅女性計算×0.8=每天要攝取44g蛋白質

 

點樣揀「健康飯盒」?

依家愈來愈多人注重食物對身體有冇正面影響,但只係一、兩日食得清啲冇咩幫助,而係要建立長期同規律嘅健康飲食習慣。而且大部份人仲認為食得健康就係要食得清,就咁烚熟嘅菜同冇味嘅食物,然後食一排會覺得好痛苦,想放棄。我都想透過Health Box嘅健康飯盒去改變呢種大眾觀念,點樣享受食物,食得對身心健康更加有益,又可以達到目標。

Smokey maple roast pork with purple potatoe balls and mixed vegetables(HKD90+[價錢按訂飯嘅日數有所調整])

所以均衡嘅膳食應該含有低升糖指數(GI)嘅碳水化合物、蛋白質、適量嘅健康脂肪同大量纖維。揀健康飯盒嘅時候,天然顏色愈豐富就愈好,因為咁表示你會食到各式各樣嘅蔬菜。同埋要確定你想要達到咩效果,係減肥、增加肌肉定係其他目標先揀到需要嘅飯盒。

自己煮要注意咩?

其實蒸係一種好好嘅方法,食物唔會變乾,亦有利保持食物原有嘅營養價值。但要注意數量!我哋有營養師計算食物嘅卡路里等營養成分,但自己煮好易側重某啲食物而變成食過量,對身體可能有反效果。如果你想食得啱,一定要確定你要消耗嘅量,避免不知不覺食多咗而吸收過多卡路里。

您也許也會喜歡…

發表迴響

你的電子郵件位址並不會被公開。 必要欄位標記為 *