【素食+甜品創新組合 必試黑松露×四國芝士】素學堂

喺尖沙咀厚福街嘅2DP大家去過未呢?一間店一個故事時間嚟喇!原來老闆Simon五年前因為家人病逝,失去咗至親,漸漸了解到飲食習慣對身體嘅重要性,佢仲開始咗食素嘅生活,最後決定裸辭百萬年薪工作,同囡囡一齊創業。就係咁,2DP就以新式素食、茶飲同甜品做主打,開業一年多慢慢站穩陣腳喇!

Simon話雖然素食喺香港唔算係主流,但餐廳團隊好俾心機去構思同創作新式素食,真係好創新㗎!最新嘅素食主題係黑松露crossover四國芝士,邊四國?分別係瑞士、荷蘭、意大利同法國芝士,而黑松露就由意大利原個空運到港,真係聽到都流哂口水喇!食完主食仲可以歎埋甜品添!不過提提你,呢個主題餐做到1月6號咋,快啲試喇!

呢個橙紅菜頭·青蘋藜麥沙律(HKD98)真係女人恩物!黃菜頭同紅菜頭嘅微量元素例如碘、鋅、鐵等等非常豐富;而藜麥嘅膳食纖維豐富、澱粉含量低,除咗富含植物性OMAGA-3、維他命E同不含麩質之外,藜麥係零膽固醇嘅食物,升糖指數只係得35,遠低於低升糖食物標準(數值55)。加埋廚師特製嘅香草蘋果醬同檸檬油醋汁,酸甜開胃又好味,唔怕肥呀!

牛肝菌輕芝士煲仔大麥飯(HKD118),今次用大麥取代米,含豐富纖維同低升糖指數。意大利直送嘅牛肝菌加埋芝士同雜菌慢火熬製,大麥充滿牛肝菌同芝士嘅香味,啖啖都好滿足呀!不過記得趁熱食先最好味㗎!

小編最愛呢個黑松露·芝士意大利雲吞(HKD128),雲吞上面刨上新鮮黑松露薄片,而雜菌清湯湯底好香菇味,飲落好清新,能夠突出到雲吞裡面嘅黑松露同芝士味,正!

重點推介黑松露·芝士熔岩竹炭盒子(HKD198),竹炭盒子同麵包磚都係特別訂製,坊間好少會見到,呢個竹炭盒子就好似芝士火鍋嘅變奏版咁,挑空咗竹炭包,裡面就倒滿滿嘅芝士!而芝士熔岩係廚師特製,分別用咗四種芝士:巴馬臣芝士、水牛芝士、煙燻水牛芝士同瑞士格呂耶爾芝士,拉絲效果一流;再加入黑松露同黑松露油,最後喺芝士熔岩面頭再刨上黑松露薄片,鍾意食芝士同黑松露千祈千祈唔好錯過呀!小編覺得太好味話咁快成個食晒!

相信唔少人都試過2DP嘅甜品,今次新出嘅甜品將傳統港式糖水大翻新,將傳統特色糖水加入新元素!好似黑糖紅棗桃膠燴原個雪梨(HKD78)啱晒冬天食,先用雪耳、桃膠、紅棗同桂圓肉熬出糖水底,再用原個韓國雪梨燉2-3小時以確保雪梨夠腍,最後雪梨面頭用少少黑糖燒到帶焦香,夠晒滋補養生又好味!仲有一小瓶嘅黑糖糖漿俾你調配適合自己嘅甜度,不過小編就覺得落少少糖漿已經好夠味,同埋分量好足夠,2個人share都夠食!

提提大家,因為2DP團隊每日朝早會親自到果欄揀選最新鮮水果,會即日設計同改良食譜,所以有機會唔係韓國雪梨,可能係富士蘋果或者夏威夷木瓜等等,每日供應亦有限,要試就要快啦!

另外港式·老薑蕃薯奶露·芋圓桃膠(HKD62) 顧名思義由老薑番薯糖水演變出嚟,睇落有啲似焦糖燉蛋,加入咗忌廉同牛奶將佢打滑,再加埋地瓜圓、芋圓同桃膠,食落口感豐富;奶露本身就無咩薑味,所以會附上一小瓶薑汁調配合適味道,真係夠晒貼心呀!

 

2DP
地址:尖沙咀厚福街12至12號A藍馬商業大廈地下
電話:2276 5777
營業時間:星期一至四:12:00-00:00,星期五至六:12:00-01:00,星期日:12:00-00:00

You may also like...

Leave a Reply

Your email address will not be published. Required fields are marked *