【手工烘焙牛角包爆紅 灣仔概念店限定閃電酥】Concept品穀

其實香港唔少人都係麵包控,小編都唔例外!今次想同大家推介呢間人氣烘焙店品穀。老闆Andrew同Jeffrey相當年輕,兩位都係90後,當初懷住一顆赤子之心創業,目的就係希望香港人可以食到一啲無添加劑嘅健康麵包,Andrew更因為咁而遠卦日本學習無添加嘅烘焙技術,超有heart!

Andrew(右)喺日本學滿師之後,15年就孖住法式甜品師老友Jeffrey(左)喺佐敦開咗第一間店,最新灣仔店就喺今年初開埋!最招牌嘅就係多層牛角包,所有嘅出品全部都係每日現場新鮮製作,絕對無添加任何化學物質或者防腐劑。為咗牛角包呢個recipe,兩位老闆研究咗足足成年有多㗎!兩位老闆為咗呢個「親生仔」真係出心出力㗎,由佐敦小店做到依家喺灣仔擁有過千呎嘅概念店,真係一啲都唔簡單㗎!

睇見個未完成品都覺得流口水喇!牛角包每個都係人手做,整得超靚又整齊!

黑豹芝麻牛角包(HKD32),麵團入面加入咗竹炭粉來調色,一黑一白捲出層次分明嘅牛角包。咬入口層次豐富,酥脆香口。

另外閃電酥係灣仔店限定嘅新產品。左邊嘅焦糖堅果閃電酥(HKD32),主要用法式甜點嘅做法,將多款堅果搭配焦糖,堅果可以中和焦糖嘅甜膩感,再加上糖粉成件事夠晒match;中間嘅檸檬芝士閃電酥(HKD32)就相對比較fresh,鬆脆香囗嘅酥皮配搭忌廉芝士同埋酸甜嘅新鮮檸檬,配埋杯紅茶就perfect喇;右邊超級草莓閃電酥(HKD32)啱晒嗜甜嘅朋友喇,用自家製草莓果醬,再配以新鮮草莓粒,除咗賣相夠晒grand,口味亦好啱女士們做下午茶,草莓控不能錯過呀!

除咗賣麵包,其實仲有賣茶飲㗎!從左至右:熱帶鐵觀音(HKD36)蜂蜜菊花普洱奶茶(HKD$36)巴西莓烏龍(HKD36)都係招牌無添加茶飲,用嘅茶底全部都係香港人由細到大飲慣飲熟嘅茶種。最特別係中間嘅蜂蜜菊花普洱奶茶,面頭嘅蜂蜜蛋白霜係新鮮即打,可以中和普洱嘅微澀,令大家對中國茶有全新嘅體驗。

Concept品穀
地址:灣仔太和街10-20號福和大廈地下B舖
電話:3460 4203
營業時間:星期一至日:08:00-20:00

You may also like...

Leave a Reply

Your email address will not be published. Required fields are marked *