【新派健康果飲杯杯靚色 自創極濃乳酪奶蓋零負擔】輕時光

慣咗飲台式飲品,又嫌佢唔多健康?依家有另一個健康又好飲嘅新選擇喇!呢間輕時光主打一系列健康鮮果飲品,強調低脂少糖亦堅持唔落糖漿,而用自家即日熬煮嘅桂花蜜,希望好飲得嚟,仲可以兼顧埋健康添。店主話有一次去泰國旅行見到當地好盛行呢種健康果飲,又發覺香港比較少同類型嘅飲品店,於是好想由自己做起,將呢種風氣帶嚟香港咁話。唔好睇啲飲品顏色咁豐富咁鮮艷以為加咗色素呀,其實全部來自水果嘅天然顏色,冇加任何香精同色素㗎!店主寧願製作成本高啲,都堅持用最新鮮嘅食材去保持飲品質素。咁健康,睇吓有咩咁特別先!

飲品店開喺天后,位置都幾容易搵,店面擺滿好多綠色植物,店內嘅裝修就以白色為主,用木牌做Menu掛喺牆上面,感覺好自然悠閒。舖位細細,一望就見到開放式水吧,可以睇住成個製作過程。轉角位仲有一張微型小長吧枱仔俾客人好chill咁坐低飲嘢,名副其實好似店嘅英文名咁”Take Your Time”!

介紹吓咁Colorful嘅鮮果特飲先,呢杯咁搶眼嘅紅火龍優格果昔(HKD32)用紅肉火龍果加雪白乳酪同鮮奶嚟打呢個果昔,咁有層次嘅紅白配搭,淨係賣相都加晒分啦!選用紅肉火龍果除咗顏色吸引,營養價值更高,成杯飲晒都輕鬆冇負擔啦!

超級水果茶(HKD32)概念來自水果杯,想做到成杯都充滿新鮮水果,再配上清茶,飲落更加fresh。叫得「超級」水果茶,原因係超級大杯呀,水果嘅種類同一般嘅水果茶差唔多,但就比較重熱情果味,好有果香,解渴一流!

平時飲奶蓋飲得多,未試過飲乳酪整嘅奶蓋。呢杯芒果優格蓋茶 (HKD34)嘅特別之處係面頭嘅「奶蓋」同坊間嘅奶蓋唔同,係舖頭自創嘅乳酪奶蓋,以低脂乳酪打成,有好濃嘅乳酪味道之外,仲有奶香,同咁清新嘅芒果味好夾,又冇平時啲奶蓋咁膩;茶嘅部分就將芒果肉打喺茶入面,所以成杯茶嘅芒果味都好出,仲會食到啲果肉添。

紅火龍乳酸(HKD26)一到手有兩層,上面有好鮮艷嘅桃紅色係攪拌咗嘅火龍果肉,下面就係乳酸。本來以為火龍果同乳酸嘅味應該唔多夾,點知攪勻咗嚟飲又幾Match噃,仲好有新鮮感。

除咗鮮果系列,仲有啱晒抹茶控嘅抹茶Oreo。時光(HKD28),先調好非常濃郁嘅抹茶再撞入鮮奶,營造漸層嘅效果,望住杯飲品都夠晒療癒;面頭仲放咗好多Oreo餅碎,咬落會有啲咬口。幾時都話,抹茶加鮮奶呢個組合真係冇得輸,依家咁嘅天氣仲可以揀暖笠笠嘅熱飲,一樣咁好飲㗎!

 

輕時光
地址:天后電氣道83號利景閣地下1號舖
電話:5116 6865
營業時間:星期一至日:11:00-21:00

You may also like...

Leave a Reply

Your email address will not be published. Required fields are marked *