【太子街坊價車仔麵店 11餸大碗麵$30勁足料】平霸

車仔麵喺香港成街都係,呢間日昇車仔麵有咩咁特別?可以吸引到平霸注意嘅梗係因為夠平啦!呢間車仔麵喺太子已經做咗好多年,係好多街坊同學生嘅平價食堂,廿幾蚊食到三餸麵,30蚊仲食到11餸麵添,邊度搵呀?


麵店舖面比較細,擺咗一個車仔檔同飲品櫃,行到入去就見到有一排細枱俾食客坐,成間舖大概有6-7張雙人枱同埋兩張四人枱,右邊就係開放式廚房。環境唔算好寬敞,但以麵店嚟講都幾乾淨企理。舖頭啲店員阿姐態度幾好,見到有客人唔識劃點餐紙,仲好有耐性咁講解添。

最低消費係三餸一麵,定價只係6-7蚊一樣餸,加埋最平25蚊就可以食到捧住個肚走。平霸留意到一個抵食之選,呢款有11個餸嘅一品麵都只係30蚊。相比起坊間嘅車仔麵,嗌兩、三個餸都唔止呢個價啦。如果鍾意試多啲唔同嘅餸,點呢個一品麵就最啱喇!呢度啲車仔麵有得自選辣度同加腩汁,都係唔使額外加錢嘅。

咩都想試嘅平霸就揀咗呢碗一品麵 (HKD30)小辣加腩汁。熱辣辣嘅麵一送到嚟,聞到好香嘅辣味同少少嘅麻油香已經食慾大增喇,見到鋪喺面啲餸幾乎遮晒個麵底,感覺好豐富,比較特別嘅餸係豬皮、豬紅、雞翼尖同鳳爪,都係舖頭自製嘅。麵面頭有啲比較稠嘅就係佢哋秘製嘅辣汁,呢個辣汁唔會淨係得死辣,仲食到唔同嘅香料味,不過都真係幾辣,唔太食到辣嘅朋友仔記得提佢哋唔好加咁多喇。如果食唔到辣嘅,都可以加腩汁,個湯頭就香濃啲,唔會咁清。

個麵冇加底,分量都好夠。值得一提嘅係,好多茶記、麵店轉烏冬係要加錢嘅,但呢度係唔使㗎!呢啲細節位都令平霸加咗唔少分。呢個烏冬偏軟身,但唔會一夾就斷,口感尚算彈牙。

成碗一品麵有兩隻雞翼尖,啲雞翼尖應該用咗佢哋嘅咖喱汁去煮,入口比想像中辣,但個咖喱味幾濃,好入味,鍾意食辣嘅朋友仔就要試試佢喇!

呢隻鳳爪就炆得夠入味,有陣八角香味,都有少少辣,但就冇雞翼尖咁辣,幾啱平霸口味。雖然成碗得一隻唔係好夠喉,但勝在有其他餸搭夠,幾有新鮮感呢。

其實除咗頭先介紹嗰兩樣餸之外,成碗麵整體上真係唔錯,魷魚好爽口、豬皮好香麻油味、牛腩夠腍身,菜嘅分量亦算多,有3-4條左右,唔似其他車仔麵咁得嗰一、兩條伴碟。至於其他餸都不過不失,以咁嘅價錢真係超值喇!

 

平霸小評:依家喺香港連車仔麵都愈食愈貴,吓吓要四、五十蚊先埋到單,搞到有時想嗌多個餸都唔敢。好在呢間車仔麵店逆市做緊30蚊11個餸嘅大碗車仔麵,而且唔係得個平字,仲夠晒足料,食物質素認真唔差㗎,豬皮、雞翼尖同鳳爪呢啲餸入味之餘,款款都唔同煮法,平霸一定要俾Like佢吖!

日昇車仔麵
地址:太子荔枝角道82號地下
電話:2380 1068
營業時間:從缺

You may also like...

Leave a Reply

Your email address will not be published. Required fields are marked *