【港大素餐廳搞覺醒自助餐 下午茶30蚊有找抵食惜食】素學堂

大學飯堂唔一定只得頹飯食嘅,小編今次就帶大家去呢間位於香港大學嘅一念素食,環境夠晒舒服光猛,午餐時段人流都幾多㗎,快啲入去睇吓先!

午餐主題原來係「覺醒自助餐」,有得任食唔怪得吸引咗咁多人啦!自助餐分量同價錢以HKD16/100g計算,現場大約有十多款素菜選擇,亦有幾款唔同嘅點心同糕點,而紅米飯、湯同熱茶都係免費自助任添!夾完餸就到收銀處磅重俾錢,全程真係好自助㗎!所謂「覺醒自助餐」,其實係想食客對食物要有一種覺醒,意識到食幾多就俾幾多錢,就喺一念之間,希望大家都學識「惜飲惜食」,唔好做大嘥鬼呀!

小編今次揀咗幾款鍾意嘅點心同糕點先,春卷炸得脆卜卜但唔會太油,其他糕點嘅味道都唔錯,呢一碟嘅價錢係HKD27,加上飯同湯可以任添,咁都幾扺喎!

另外揀多一碟有菜、蘿蔔糕、鮮竹卷嘅餸,呢碟就重啲要HKD51!小編覺得鮮竹卷多餡多汁好好味,不過分量就實多咗同重咗,所以夾嘅時候真係要諗清楚,食得晒先好夾呀!

「覺醒自助餐」供應嘅時間係11:30-14:30,如果趕唔切食,小編就推薦大家兩點半去食下午茶喇,抵食又夠飽啫!

下午茶有6款食物選擇,任揀2款包飲品都只係HKD29咋,小編今次叫咗三絲炒銀針粉同香草薯蓉米通,飲核桃豆漿。分量都好足夠,脆卜卜嘅米通加埋薯蓉一齊食口感十足。

小編仲試埋湯麵/湯飯套餐(HKD28),叫咗個素肉骨茶湯河,包一杯是日特飲,當日飲品係蘋果洛神花蜜,夠晒養生;湯河附有素魚片同菜,而湯底肉骨茶味啱啱好唔會太濃同太鹹。

餐廳亦設有小賣部,除咗有唔同嘅小食之外,亦有售賣可以循環再用嘅飲管同餐具,唔止環保,餐廳仲有「咪嘥嘢食店」嘅認可資格,同食客共同減少廚餘之外,員工當中亦都聘有聽障及輕度智障人士,好實在咁發揮平等機會精神,值得支持呀!

 

一念素食
地址:薄扶林香港大學百周年校園逸夫教學樓地下
電話:2964 9011
營業時間:星期一至五:08:00 – 21:00,星期六:11:30 – 21:00

You may also like...

Leave a Reply

Your email address will not be published. Required fields are marked *