【椰子油係「純毒藥」? 一日一湯匙係極限呀!】懶健康貼士

椰子油近年被吹捧為超級食物,聽到身邊唔少朋友都會將椰子油加入飲食行列。好多網站亦不約而同話佢點好點好,又減肥燒脂,又增強免疫系統,又預防心臟病等等。不過一位哈佛大學營養教授今年年中喺營養講座,評價椰子油係 「純毒藥」!其實一直有唔少研究指出椰子油會提高壞膽固醇水平,美國心臟協會(AHA)喺上年嘅報告都建議唔好使用椰子油,建議用橄欖油同花生油呢類不飽和脂肪代替添。

增加壞膽固醇嘅主要元兇

喺結構上,椰子油集合咗幾種飽和脂肪中嘅壞脂肪,例如月桂酸、肉荳蔻酸同棕櫚酸,係引致壞膽固醇增加嘅主要元兇嚟㗎!其實椰子油同其他油一樣含有高卡路里同總脂肪,以一湯匙計就大約有120卡路里同14克脂肪,其中80-90%仲係唔健康嘅飽和脂肪添!不過衛生署同食物安全中心都將椰子油歸類為飽和脂肪嘅來源,因為佢嘅飽和脂肪含量(92%)比牛油(66%)同豬油(41%)仲要高出好多,大量或長期攝取反而會吸收過多熱量引致肥胖同增加心血管疾病風險。

對椰子油嘅誤解

因為椰子油含有「中鏈甘油三酯」Medium Chain Triglycerides(MCTs),比其他脂肪快被身體吸收,而吸收嘅速度同葡萄糖相似,一進入肝臟就即刻用得同提供能量。因為身體可以快速吸收同使用「中鏈甘油三酯」(MCTs),可以幫助增加飽腹感同防止脂肪儲存喺身體,所以係其中一個理據解釋椰子油係健康嘅原因。不過好多人將椰子油同「中鏈甘油三酯」(MCTs)劃上等號,但要達到健康效果係要大量攝取經特殊配製而成嘅椰子油100%「中鏈甘油三酯」(MCTs),而唔係一般超市貨架上大概得16%「中鏈甘油三酯」(MCTs) 嘅常見椰子油。

點食椰子油健康啲?

不過用椰子油煮餸真係幾香嘅,如果真係想落就要留意分量喇!美國心臟協會建議唔好攝取超過飽和脂肪總卡路里嘅6%,即係2000卡路里嘅飲食中有一湯匙椰子油(13g)已經接近一日嘅攝取上限,因為入面已經含有大約12克飽和脂肪喇。

 

Moses Lee

現為“My Fitness”註冊營養師、澳洲營養及飲食治療碩士同澳洲營養師協會會員,擅長體重管理同運動營養。曾於醫院、社區中心、教會同非牟利機構等地方提供營養服務、舉辦營養講座同烹飪示範。現在為有需要控制體重嘅人士同運動員提供營養治療,制定飲食方案。

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *