【車仔麵同甜品邊間值得試?米芝蓮小食推介朝聖攻略】2019米芝蓮小食推介

2019米芝蓮名單之前已經揭咗盅喇,不過咁多間上榜餐廳係咪真係咁有料到呢?今次小編就揀咗街頭小食推介入面嘅得主,同大家試吓入面3間車仔麵+2間甜品店,睇吓邊間最值得大家朝聖,臨年尾最後一日幫你做個實測!

三大車仔麵

連續兩年上榜嘅文記車仔麵!呢間文記認真架勢,同一條街開足三間分店,但依然成日大排長龍,究竟味道如何?

落單係用膠餐板剔低,再交俾店員就得喇。循環再用幾環保喎!

一上枱就聞到濃濃香氣,小編揀咗油麵(HKD9),腩汁湯底另加秘製辣汁。湯底顏色偏深,秘製辣醬偏膏狀,睇落幾吸引喎!瑞士雞中翼(HKD13)色水夠晒靚仔,咬落啖啖肉,瑞士汁甜甜哋超入味!

玻璃辣魷魚(HKD13)係其中一個必食item,魷魚醃得勁入味,爽口彈牙!

另外酸齌(HKD10)亦好受歡迎,煮得夠晒腍身,酸酸甜甜好開胃!索晒汁啖啖都食到香濃湯底精華,必食之選!

呢間文記車仔麵的確幾高質,除咗湯底夠濃郁,各款餸嘅味道都相當不俗,不過價錢略貴咗少少,一碗三餸麵要成40幾蚊埋單,值唔值就見人見智喇!不過味道真係稱得上係車仔麵界裡面數一數二咁好嘅!值得一試。

文記車仔麵
地址:深水埗福榮街123號地下C舖
電話:從缺
營業時間:星期一至日:11:00-01:00

 

呢間喺荃灣千色店附近嘅千色車仔麵都同文記一樣蟬聯米芝蓮街頭小食推介第2年喇,望落門面好似冇文記咁企理,感覺再貼地少少。究竟味道又係咪真係咁正呢?

湯底比文記嘅相比就淡色好多,成碗麵俾人感覺都清淡啲。小編叫咗豬腸(HKD11)牛腩(HKD10)魷魚(HKD10)粗麵(HKD8),三餸麵盛惠39蚊。

粗麵就係普通嘅粗麵啦,冇咩特別。湯底雖然淡色但出乎意料地鹹,飲得出係味精湯。

豬腸幾爽口,係豬小腸。望落洗得幾乾淨吓,冇白白黃黃嘅肥膏,用滷水滷過,幾吸汁。呢個豬腸幾高質!

牛腩夠腍,不過味道就唔算話好濃,有少少俾湯底嘅味道搶咗味道。質素算係中間啦!

比起文記,千色車仔麵真係好貼地好地道嘅本土車仔麵。大家食車仔麵都係為求最短時間醫飽肚,咁佢絕對做得到嘅,起碼唔使好似文記咁大排長龍先啦!

千色車仔麵
地址:荃灣兆和街49號地下
電話:2492 2831
營業時間:星期一至日:11:00-22:00

 

壓軸登場就係呢間今年新上榜嘅蜜斗,主打Fusion車仔麵,打破傳統車仔麵一成不變嘅舊有框框。

呢碗芝麻花生味純米線(HKD49)係佢哋推介Menu嘅第一位,普通花生醬麵大家應該唔陌生啦,咪即係擔擔麵囉!不過呢碗仲加埋芝麻,而且湯底幾清喎,究竟咩料呢?

潮式滷肉碎都有少少花生醬味,湯底似清雞湯,食落幾fresh;另外仲附有一兜仔芝麻花生醬,口感醇厚花生味濃,攞嚟點手絲雞一流喎!

另外呢個泰式fusion版車仔麵泰式咸肉油蛋麵(HKD59)亦幾特別喎!除咗有隻超溏心嘅蛋之外,仲有醃鹹五花肉添!撈埋自家製嘅泰式酸菜,酸酸鹹鹹超開胃喎!

如果大家都懷住一顆破舊立新嘅心,呢間新派車仔麵萬勿錯過喇!

蜜斗
地址:中環伊利近街12A號地舖
電話:9799 0901
營業時間:星期一至三:12:00-16:00;星期四至五:12:00-16:00;19:00-22:00;星期六:12:00-16:00

 

新舊甜品

講完正餐就講吓甜品喇。呢間榴槤樂園係新上榜喎,聽講仲喺澳門開埋分店添!睇嚟來頭唔細喎。

叫得榴槤樂園,主打當然係榴槤相關小食同甜品啦!成間舖頭都水果黃色,幾有feel喎!

榴槤芝士撻(HKD25)賣相相當唔錯!雖然唔係新鮮焗起,撻皮略嫌有啲唔夠脆,不過勝在榴槤芝士餡味道夠濃郁,榴槤控一定鍾意!

除咗榴槤嘅副產品之外,呢度亦提供原粒貓山王榴槤(HKD110/磅),等榴槤控可以食返夠本!睇到啲榴槤肉色水夠黃又脹卜卜咁就知靚嘢喇!咬落非常creamy,正喎!

呢間專食榴槤嘅新店根本就係榴槤愛好者嘅天堂呀!鍾意榴槤嘅一定必試!

榴槤樂園
地址:尖沙咀金巴利道92號地下
電話:9283 8108
營業時間:星期一至日:15:00-23:00

 

最後呢間坤記糕品望落就夠晒老字號喇!主打各式中式糕點,價錢相當親民。賣嘅全部都係童年味道呀!

砵仔糕(HKD6)一個個入好晒袋,每日新鮮整,夠晒新鮮!

最出名係呢個9層芝麻糕(HKD12/按重量計算)!細心啲睇真係見到層層分明㗎!芝麻味好香濃,好似食緊芝麻糊咁。

另外白糖糕(HKD8)亦夠晒傳統,整得唔好嘅白糖糕會有好大陣酸味,坤記呢個唔錯,咬落微酸,甜度適中,軟軟綿綿咁。

最後呢個用塊葉包住嘅就係豆沙糯米糍(HKD9),除咗豆沙餡之外,仲有花生餡可以揀!糯米皮超煙韌,質地咬落好QQ,豆沙餡亦幾足料,啖啖都食到香濃豆沙。

小編覺得今次試嘅三款糕品都相當唔錯,而且價錢都算合理。傳統糕點買少見少,希望攞咗米芝蓮繼續長做長有呀!

坤記糕品專家
地址:深水埗福華街115-117號北河商場地下10號舖
電話:2360 0328
營業時間:星期一至日:08:00-23:00

You may also like...

Leave a Reply

Your email address will not be published. Required fields are marked *