【麥記走塑凍檸茶冇飲管 網民質疑:選擇性走塑!】食焦

環保環保,好多人都話要環保,近年仲有唔少餐廳食肆大鑼大鼓咁話要響應,紛紛都話要走塑,麥記喺平安夜開始就坐言起行唔走數喇,全面走飲管,有埋slogan叫「麥麥走飲管」㗎!講到環保咁大個題目,講真唔會有人反對㗎喎,不過可能啱啱開始,搞到有唔少食客都有怨言囉!

呢支係事主形容為「軟拉拉」嘅膠棒仔,咁即係平時飲熱朱古力嗰支嘢咋喎!麥記又話有木棒嘅? (香港討論區圖片)

最後俾多套刀叉叫事主自己篤個檸檬,又多套膠刀叉,好多膠啫!(香港討論區截圖)

有網友就喺香港討論區度開po,話麥記為走塑而走塑喎,事主好日都唔去麥記食早餐,咁啱去食個早餐配個凍檸茶,冇!飲!管!「後來,服務員都唔好意思,周圍搵,咩都搵唔到,唔知係咪早過頭啦,講咗幾次唔好意思,最後畀佢搵到一支軟拉拉嘅膠棒仔,有支飲管都話可以用飲管篤。連飲管都冇,點篤?最後,畀多一套刀叉我叫我自己篤。」

飲管同膠袋真係罪大惡極呀?(香港討論區截圖)

網友話係「多膠餘!」(香港討論區截圖)

支持唔好出街食同飲任何嘢係咪? (香港討論區截圖)

有唔少網友得出嘅結論係,膠棒仔、刀叉其實都係膠喎,點解要判咗膠飲管先係有罪仲要死刑冇得再出現,反而膠刀膠叉膠杯膠蓋膠棒又冇罪?全部都仲生存緊喎,於是有好多網友都話麥記根本就係選擇性走塑,有網友仲話「走塑就唔好有開心樂園餐啲公仔」添,好笑,又啱喎!

紙飲管飲思樂冰,真係幾高難度喎!(香港討論區截圖)

直頭冇飲管,好在唔使篤檸檬。(香港討論區截圖)

要大家響應環保都要有過程適應吓嘅,亦有網友話啱啱走塑大家仲未習慣啫!依家全面走飲管就有網民話點解唔俾紙飲管人飲?不過有網友提供另外例子,話之前去海洋公園飲飄雪冰,已經係用紙飲管,但係用嚟飲呢啲思樂冰類嘅飲品真係好唔方便囉!講返轉頭,麥記喺專頁度公佈走塑,係有講到「所有飲管箱會清空,亦唔會主動派發飲管,而需要攪拌的飲品則會使用木攪拌棒取代以往的塑膠攪拌棒……其他飲品如需飲管,請向職員索取!」咁事主其實可以開聲要返支飲管喎!

麥麥走飲管,下一步唔知輪到走咩呢? (McDonald’s fb專頁圖片)

有網友留言話「從來你地都無主動提供過飲管,宜家只係由唔洗問直接拎變成要每次問員工拎飲管,最後就係辛苦既就係班前線,多謝高層!」大家點睇? (McDonald’s fb專頁圖片)

You may also like...

Leave a Reply

Your email address will not be published. Required fields are marked *