【元朗首創喇沙龍蝦鴛鴦麵 懷舊魚腸焗蛋限量出品】18家

一向都知元朗美食雲集,依家小編就搵咗間喺元朗主打東南亞料理嘅新店介紹俾大家。12月初開業嘅呢間小店18家將東南亞唔同嘅菜式改良,變成迎合到香港人嘅口味,又不失傳統嘅特色菜。聽講仲有款好抵食嘅原隻龍蝦喇沙鴛鴦麵,自稱係元朗首創添,即刻睇吓佢嘅蘆山真面目啦!


舖頭位置唔算喺好熱鬧嘅大街,但一啲都唔難搵,「18家」招牌好搶眼,小編遠遠就望到。雖然附近主要都係食肆,但就得呢間做東南亞料理。入面地方比較細,啲位都幾狹窄,似比較家庭式嘅料理店。

招牌菜嚟喇!呢碗喇沙龍蝦鴛鴦麵(HKD98)一送到上枱真係幾震撼,成隻龍蝦放係麵上面,分量十足,而且隻龍蝦長過小編隻手掌,都幾大隻㗎!店主話啲龍蝦全部由加拿大入口,有晒證書,絕對唔係平貨。依家唔使100蚊一碗喎,淨係隻龍蝦都抵返晒啦!如果唔識剝龍蝦,店員會好熱心咁教埋你剝,三兩吓手勢就起埋成隻龍蝦肉,拆出嚟啲肉唔算好多,但望落幾飽滿,肉質爽口唔會散。除咗龍蝦,湯頭都係賣點之一,入面個椰奶味夠晒香,就咁飲個湯唔係好辣,但幾濃,再撈埋旁邊嘅喇沙醬,喇沙香味就會再強烈啲,連埋鮮甜嘅龍蝦食係幾夾嘅。

點解會叫鴛鴦麵?答案就喺度喇。麵底係用咗米粉同油麵兩種麵,呢兩種麵口感好唔同,夾埋一齊食又幾有新鮮感!麵質偏硬身,雖然建議客人先食喇沙麵再拆龍蝦嚟食,但係即使遲咗食個麵都唔會咁快吸晒啲湯,浸腍晒。值得一提係呢個喇沙麵好大份,有主角龍蝦,仲有青口、豆卜同魚片,麵底分量又多,真係食到捧住個肚走。胃口唔大嘅人可以同朋友Share,再嗌其他小食就夠晒滿足喇!

舖頭另一個特色菜就係呢個懷舊鮮魚腸焗蛋(HKD68) ,可能唔少後生仔都冇乜聽過或者食過魚腸焗蛋呢道菜,因為整呢道菜要好花心機同技巧,要逐條魚腸清洗得好乾淨先至好食,唔係好多廚師識處理,所以依家自然買少見少。整得唔好嘅魚腸好易有苦味,但呢個魚腸焗蛋食落真係一啲苦味都冇,有魚嘅鮮味又唔覺得腥,面頭放咗啲油炸鬼去焗,更加有層次感,不妨一試呀!不過因為呢道菜嘅製作過程比較繁複,所以舖頭每日只會限量整大約10個左右,賣晒就冇㗎喇。

呢個就係期間限定嘅十八家雞煲(HKD118/半隻、HKD168/一隻),裡面嘅辣椒香料由四川直送,所以風味十足,非常惹味。雞煲入面嘅雞肉煮得入味之餘,肉質竟然仲幾嫩,不過佢哋嘅雞煲係煮好先上枱,唔會好似平時啲雞煲咁埋位煮熟。記住呢款雞煲係冬季限定,應該淨係做到2、3月。

小編特別鍾意食呢款黃金海蝦球(HKD88),一隻隻海蝦肉沾上撈咗鹹蛋黃嘅炸漿炸成,粉漿同平時食開嘅有啲唔同,比較鬆脆,加上入面嘅海蝦肉好爽,有種外脆內軟嘅感覺,仲有好濃鹹蛋黃嘅鹹香味添。

咖喱牛筋腩煲(HKD68)就用咗馬來咖喱,椰香味重,面頭灑滿椰絲,食肉嘅同時食到椰絲嘅粒粒感,咖喱汁比較濃稠,送飯一流喇!呢啲小菜可以加$15轉套餐,配白飯同熱飲。

左:炭燒豬頸肉(HKD38)右:炸蝦餅(HKD38)呢啲特色小食幾香口又唔貴,蝦餅仲係自家製,認真抵食呀!

 

18家
地址:元朗教育路81至85C號元達樓地下6號鋪
電話:2613 0222
營業時間:星期一至日:11:30-22:00

 

 

You may also like...

Leave a Reply

Your email address will not be published. Required fields are marked *