【深水埗餃子店特價下午茶 逆市長推$19高質大隻餃】平霸

20蚊食一個下午茶,依家都幾難搵得到喇!深水埗呢間圓方餃子粥麵嘅餃子好食就出晒名,原來下午茶仲平到20蚊有找!今次平霸就同大家試匀佢哋兩款下午茶餐,睇吓係咪又平又抵食啦!

兩款原價25蚊嘅湯餃同粉麵,喺下午茶時段特價只係19蚊咋!雖然下午茶係唔包飲品,但係咁平價就食到大碗又好味嘅下午茶,都好吸引噃!不過記住呀,下午茶時段只限星期一至五下晝3點至5點,星期六、日同公眾假期係冇㗎。

平霸四點幾去到,竟然見到門口大排長龍,原來係排隊買生餃,證明佢哋啲餃子幾咁受歡迎。堂食就唔使等,入面環境幾乾淨,有5-6張大圓枱,每張大概可以坐到6個人,如果得自己一個或者同個朋友嚟食就通常都要搭枱。今次平霸叫咗兩款下午茶餐,兩碗唔使5分鐘就送到上枱喇。

連招牌餃子都有下午茶,呢款魚湯韭菜餃(HKD19)一碗有成8隻韭菜餃,仲要隻隻都咁大隻,連平霸都覺得幾驚喜。湯餃隻隻都好完整,啲皮冇爆開或煮到爛,而且餃子皮夠晒薄,煮熟之後透到韭菜嘅翠綠色出嚟添!個湯頭係奶白色嘅魚湯,感覺幾濃郁。

隻韭菜餃有成隻匙羹咁大,一啖都食唔晒,即係唔會因為下午茶就包得細隻啲囉,抵讚!湯餃咬落好香韭菜味,入面啲豬肉肥瘦適中,仲有少少湯汁滲咗入去,果然高質呀!奶白色嘅魚湯飲落冇乜味精味,唔覺得鹹,但魚味唔太重,不過不失啦。

另一款下午茶就係墨魚丸河粉(HKD19),一眼望到成碗粉有成5粒墨魚丸,河粉分量都唔少,胃口唔係特別大嘅都應該食得飽;湯頭睇落就同頭先碗餃嘅湯差唔多,都係奶白色咁。

呢碗粉入面啲墨魚丸都係幾大粒,食落彈牙,咬到啲墨魚肉,同平時打邊爐嘅墨魚丸差唔多。河粉口感就比較軟身,但未至於一夾就斷嗰種,而且真係有幾多河粉,食極都仲有。個湯飲落應該同韭菜餃嗰碗一樣,都係清清哋,鍾意清淡啲嘅朋友仔就咁食都夠味,如果食得辣嘅可以加啲辣椒油食就更惹味。

平霸小評:呢間餃子店喺深水埗開業超過二十年,全部餃子都係每日人手新鮮即包,估唔到連$19下午茶都咁足料。平霸就比較鍾意食魚湯韭菜餃,真心皮薄餡靚,下午茶19蚊有得食8隻咁大隻嘅韭菜餃,點可以唔試吓呢?

圓方餃子粥麵
地址:深水埗福華街104號地舖
電話:2720 0855
營業時間:星期一至日:0900-22:00

You may also like...

Leave a Reply

Your email address will not be published. Required fields are marked *