【日式小店限量黑咖喱熱賣 $138食日本名魚性價比高】東鮨居酒屋

喺西營盤第二街盡頭嘅斜路,隱藏咗東鮨居酒屋呢間小店。開咗四個月,靠食物新鮮足料吸引到一班捧場客支持,尤其喺lunch限量供應嘅黑咖喱飯系列成日好快賣晒,想穩陣啲食到就唔好太晏去喇。當然仲有其他食物都好抵食啦,即刻同大家睇睇啦!

餐廳大約有三十個位,坐滿會有少少迫,但氣氛好似去咗日劇嘅居酒屋咁。

黑咖喱飯系列(HKD108起)嘅黑咖喱汁係將幾款海鮮、墨魚汁同日式咖喱一齊煮,所以唔會好辣,但有濃郁嘅鮮甜味。配料除咗必有嘅紅蘿蔔,仲加入蘋果,令味道更加清香。大廚話將海鮮加入咖喱嘅調配過程有啲難度,所以冇大量製作,只可以限量供應。主料有牛肉、海鮮、吉列豬排、炸雞同雜菜俾大家揀,小編就傳統啲叫咗黑咖喱吉列豬排飯(HKD128)。吉列豬排炸完都仍然軟滑有肉汁,炸漿同麵包糠都好鬆脆添。分量幾多,男士都夠食㗎。

喜之次一夜干(HKD138)係日本名魚之一,一般都要二百幾三百蚊,但喺呢度食差唔多平成半呀!不過唔係將貨就價,而係超值喎。成條魚好多肉,燒嘅時候冇太多調味,因為魚肉本身已經好甜,建議大家試咗原味先再點少少汁,太多反而蓋過佢本身味道。不過大啖食就要小心啲,因為間中有啲細骨,都易拆出嚟嘅。

食日本菜一定會點壽司,海膽油甘魚卷配黑松露醬(HKD168)係呢度嘅熱賣款式之一 。除咗面頭嘅海膽同油甘魚好新鮮之外,唔好忽視入面包住嘅拖羅蓉呀!加埋黑松露醬提味,令滿足度同鮮味程度大大提升。不過想食勁量刺身的話,就一定要揀丼飯呀!

赤蝦自選三色海鮮丼(HKD118)本身已配一隻大赤蝦,另外可以喺三文魚、油甘魚、赤身、金槍魚蓉、帶子、甜蝦同北寄貝之中揀三款,呢碗就有厚切油甘魚、L級大碼帶子同金槍魚蓉。睇相已經見到分量好足秤,芥末都唔使用太多,因為用料已經好新鮮。

呢度仲有抵食又飽滿嘅生蠔(HKD10/隻),不過食到咩地區嘅生蠔就要睇來貨情況,點之前可以問吓店員。

仲有按時令食材而轉款嘅Daily Special,務求令食客每次嚟都有新鮮感。

 

東鮨居酒屋
地址:西環西營盤第二街1-11號東祥大廈低層地下E號舖
電話:2868 2669
營業時間:星期一至四:12:00-21:00,星期五、六:12:00-23:00(逢星期日休息)

You may also like...

Leave a Reply

Your email address will not be published. Required fields are marked *