【社企餐廳帶頭搞聾健共融 餐前學手語體驗無聲晚餐】籽樂廚房

尖沙咀餐廳林立,要食西餐可以有好多選擇,不過想有特別體驗嘅一餐就唔係咁易喇!好似呢間籽樂廚房就有不一樣的用餐體驗!餐廳前身即係紅磡嘅有情有意,係飲食界頗具名氣嘅社企餐廳,九成店員為聾人或者有特殊學習障礙嘅人士,老闆娘Gladys為咗宣揚傷健共融而開呢間餐廳,希望提供到一個地方俾聾人發光發熱,依家新店就選址喺山林道。

社企餐廳俾人嘅印象通常係「有政府資助聘請某一弱勢群嘅餐廳」,不過Gladys就話:「其實我哋完全冇攞政府資助,因為我哋覺得聾人係絕對值得我哋俾錢去請,而唔需要任何資助;如果我哋攞資助,咁係咪代表我哋都認同佢哋唔值得有同普通人一樣嘅對待?」。聽完之後小編深思咗一陣,除咗佩服佢嘅勇氣之外,更加欣賞Gladys創業之餘不忘關注社會上有需要幫助嘅人士。好型呀!

現時餐廳內約9成員工都係弱聽人士,另外就係健聽但有特殊障礙人士,以制服顏色以便客人區分。店內嘅餐牌上都有手語小教學,用意希望客人可以學習以聾人明白嘅方式同佢哋溝通。Gladys話餐廳客人多數都好遷就佢哋,包容力好強。佢話最開心就係見到客人同聾人同事交流,有時係用手語,更多時候用肢體語言,呢種無聲交流,聾健人士互相理解、明白嘅感覺亦係Gladys希望客人嚟到餐廳可以體驗到嘅。

為咗宣揚共融,令更多人理解聾人文化,餐廳仲提供一個特別Menu,呢個「情聚無聲」體驗套餐(HKD198)會由聾人同事先教識你點餐用嘅手語,包括日常用語、食物同飲品等等。短短嘅「手語課」後客人要用返頭先學咗嘅手語幫自己點餐,活學活用!開頭小編以為記幾個餐點應該好簡單啦,點知原來都需要啲時間消化,用手語點餐時可能會做錯動作或者完全唔記得點做。今次體驗完之後我覺得最緊要唔好怕醜,記得幾多就做幾多,然後再用自己嘅方式盡量令對方明白,其實呢種無聲嘅交流好有趣,雖然比較費時,不過就感受到大家嘅心喺交流嗰一刻其實同步緊,小編推薦大家體驗吓!

籽樂廚房經理Anna

「Anna係我哋餐廳經理,佢工作能力真係好高,甚至比健聽嘅同事更高……開咗呢間餐廳,同聾人同事相處,我發現其實雖然佢哋某一方面有缺失,但佢哋嘅細心同埋解難能力方面真係犀利到嚇親你。」作為餐廳經理,隨時要處理好多突發事情,雖然聽唔到,不過Anna細微嘅觀察力就彌補到呢個「缺點」,令客人可以享受貼心餐飲服務。Gladys話Anna成日都會俾到Surprise佢,想知Surprise係咩就要睇Video啦!

「情聚無聲」體驗套餐精選餐湯自家製蒜蓉多士。餐湯每日都會換款,今次小編就飲到呢個蘑菇湯,飲落好fresh好新鮮,係現打蘑菇,唔會太大陣草青味,飲落仲食到蘑菇碎碎。

蒜蓉多士係小編大愛,自家製嘅蒜蓉醬好香濃,多士烘到脆一脆,冇得彈!

主食就叫咗呢個白汁黑松露青口雞柳天使麵,配搭由醬汁至配菜都係用手語落單,小編其實都係記得啲咩就叫啲咩,手忙腳亂得嚟好搞笑!黑松露味香濃撲鼻,白汁濃稠,同天使麵融為一體,perfect!

由前身紅磡有情有意到今日尖沙咀籽樂廚房,Gladys一路走來除咗有一班好幫得手嘅聾人同事之外,食客嘅支持亦都好重要!唔少食客由紅磡食到尖沙咀,定期幫襯以示支持。老實講,食物水準真係非常唔錯,定期會更新Menu夠新鮮感,再加聾健共融呢個理念,唔怪得成功留得住大家嘅胃同心啦!用自己力量去盡社會責任,絕對值得大家支持!

 

籽樂廚房
地址:山林道38號銀座38 3樓
電話:2668 0450
營業時間:星期一、三至日:12:00-22:30

 

 

 

You may also like...

Leave a Reply

Your email address will not be published. Required fields are marked *