【火腿牛角包得幾粒碎仔 連登仔:唔係點叫空氣包?】食焦

成日話百物騰貴,食物成本價高,明嘅明嘅,但係都唔使偷工減料得咁過份啩?可以去到幾盡?話說有網友喺連登開po「啱啱食左(咗)個麵包店既(嘅)火腿牛角包,師父刀功同手勢都係世界級」,真係曲到圓!事主仲po咗兩張相出嚟,係就係牛角包,但火腿呢?

真係考眼力時間遊戲開始喇!(連登圖片)

世界級刀功唔難,難在咁薄仲可以摺埋片火腿喎!(連登截圖)

呢個空氣感十足嘅牛角包,少啲眼力都好難睇得出啲火腿喺邊,事主話「可以將火腿砌到極限咁薄 仲可以圈埋佢 買既(嘅)時候如果唔係寫明火腿牛角包 我會以為係搓麵粉時唔覺意跌左(咗)塊火腿碎落去」,再睇埋另一張牛角包相,都係得2忽仔火腿碎!

網友神回。(連登截圖)

呢個提議真係唔錯喎!(連登截圖)

網友回應話「唔係點叫空氣包?」更多網友叫樓主開名公開究竟係邊間麵包舖,事主就話喺第二張相已經有提示,原來就喺嗰張影到少少麵包袋見到少少logo同幾粒英文字嘅相入面,勁過福爾摩斯嘅連登仔已經知道答案喇,認為呢個空氣包係出自一間叫「FRESH FRESH」嘅麵包舖喎!

神探連登仔就話係呢間以做卡通蛋糕為主嘅「FRESH FRESH」麵包舖喎,都有幾間分店,喺網上都發現有負評!(連登截圖)

有連登仔話幫襯過一次之後就冇回頭喇!(連登截圖)

事主冇表示係定唔係㗎,只係答返其他網友嘅問題,就係話呢袋火腿牛角包係事主老婆買返嚟,18蚊有4個!而網友就話喺呢間疑似偷工減料嘅麵包舖度,曾經都出過事,仲話呢間舖頭啲嘢食係「金玉其外、敗絮其中」添!

事主就話只係個餡出事啫!講得幾客氣!(連登截圖)

網友分享腿蛋治偷工减料圖!(連登截圖)

喺另一個專頁網友又分享咗理想與現實圖片,今次係美心嘅火鍋肥牛!(中伏飲食報料區fb專頁截圖)

You may also like...

Leave a Reply

Your email address will not be published. Required fields are marked *