【金雀改名重開都唔掂 牛柳硬掘掘薯條翻炸咁款】伏務台

其實唔少人都鍾意去港式扒房鋸扒,淋汁嗰吓之後渣渣聲好有feel,啲黑椒汁同牛扒又鬼咁夾喎。好似1962年開始喺銅鑼灣開業嘅老牌扒房金雀餐廳,當年因為王家衛嘅《花樣年華》喺餐廳取景而街知巷聞,食正當時懷舊西餐熱潮,雖然有長期熟客仔,不過坊間評語一直都話金雀其實名大於實!風光過後,2015年9月捱唔住結業,神奇地事隔9個月喺原址靜雞雞重開,再到上年9月又再度結業,仲喺Facebook帖文「我們暫時沒有計劃重開或者到其他地方繼續營業,暫時不會考慮樓上鋪,因它不能流露金雀情懷。」。不過世事邊有絕對,3個月後就原班人馬喺同區樓上舖重開,不過改咗名叫香港情。有網民慕名而來食佢嘅黑椒牛柳,但就食到好失望咁喎。小編就帶著求真心情去試吓有幾令人失望,睇吓會唔會傷感情多過香港情啦。

舊年講得好實話唔考慮開樓上舖,唔通因為咁依家要改名避嫌?

 

網民食後感。

網民未有切開嘅相,惟有睇小編嘅相啦。

小編喺接近下午兩點嘅時間去到,餐廳只有一個客仔,比想像中少人,即使係lunch水尾都唔會走得咁清啩。牆身唔似以前咁掛大幅《花樣年華》劇照,只有細張嘅懷舊港產電影海報同唔係好關事嘅《金枝玉葉》海報,而裝修就用返金雀懷舊餐廳嘅格局。

小編食返網民話出事嘅黑椒牛柳(HKD158),叫咗五成熟。

先上羅宋湯同餐包,外表冇咩問題。潷湯見都幾多料,但煲得太耐,令牛肉有啲老,湯有少少杰身,都可以飲得晒嘅。但包就有啲出事,唔熱可以理解,都係來貨餐包,但咬落去韌就真係唔理解囉……小編一向食餐包都唔需要搽牛油,但摸盒包裝唔凍,輕輕篤面頭嘅錫紙都好柔軟無阻力,所以懷疑牛油都溶咗喇。

牛柳外表都好正常,係細件咗啲,但啲炸薯條就吸引咗小編眼球,即刻近鏡睇睇先。

炸薯條係好大條,但外表已經好乾,感覺已經炸咗好多次嘅萬年薯條咁。入口同外表一樣又硬又乾,仲有少少苦味同粉粉哋。反正薯條唔係主角,試過就即刻切牛柳啦。

提吓大家,小編叫咗五成熟,但拮入去嗰吓冇「血水」,切開晒都一樣冇。睇相粉紅色幾靚係咪?但每一件都要鋸起碼廿幾吓先切得開,入口咬到表面煎到幾乾,有啲嚡;但又好奇怪中間鬆軟唔會咬到起渣,不過嗰種鬆軟唔係肉本身嘅軟腍感覺,而係似落咗好多梳打粉嗰種。黑椒汁正常,但肉味就欠奉喇,結果成碟最好食嘅係雜豆。

甜品叫啫喱走花奶以為冇死,不過啫喱落太多魚膠粉,要用啲力先拮得入,不過味道夠濃嘅;而熱奶茶嘅茶底就煲得耐得滯,有苦澀味。

 

小編伏氣:成個特餐計埋加一要HKD174,呢個價錢一定可以食到有質素又好味嘅扒餐,而唔係每樣食物都有啲位令人覺得奇怪、唔好食、甚至難食。好似餐包唔應該韌;炸薯條唔應該炸到有苦味;食牛柳五成熟都又乾又嚡……真係唔想由頭數一次,實在太多伏點。

入伏點:香港情
入伏價:特餐黑椒牛柳(HKD174已加一)

中伏by #為食加菲貓
美術by #車雲
攝影by #為食加菲貓

《伏務台》星期一伏務大眾,歡迎各界報料。

You may also like...

Leave a Reply

Your email address will not be published. Required fields are marked *