【旺角人氣老店搶手糕餅 $5煙韌紅豆燒餅買4送1】平霸

經過旺角花園街,見到呢間奇趣餅家長期都人山人海,平霸都唔執輸,逼埋入去睇吓有咩平靚正糕點先。平霸見到好多客人排隊買燒餅,好多都幾件幾件咁買走添,4蚊一塊燒餅、紅豆味就5蚊,仲要買4送1,又真係幾抵噃!唔知質素又如何呢?

臨近新年,客人除咗買平價燒餅小食,仲有唔少客人專程嚟買酥角、笑口棗呢啲過年應節食品。

平霸睇中佢哋嘅燒餅喇,有原味同紅豆味可以揀。呢度嘅燒餅因為賣得好快,所以每隔一陣就會有一批出爐,比較容易買到新鮮嘅燒餅。

原味燒餅(HKD4)入面係冇餡嘅,焗到有啲金黃色,面頭放咗幾多芝麻,食到好香嘅芝麻味。呢度嘅燒餅係甜食,原味燒餅食落都有啲甜味,平霸最鍾意佢嘅口感煙煙韌韌咁,但搣落又唔黏手,唔覺得油膩。

紅豆味燒餅(HKD5)就最受客人歡迎,出面個皮同原味一樣都係咁煙韌,入面紅豆餡唔算好多,但幾均勻,紅豆蓉甜度啱啱好,仲食到啲半溶嘅紅豆粒。食完終於明點解咁多人買,因為真係幾好味,性價比又夠高!

平霸仲買咗包光酥粒(HKD12/包),見佢咁大包先12蚊真係幾抵食,目測入面有成廿粒,每包都放咗張紙仔去標明成份同食用期限,確保返品質,買嘅時侯就唔使驚佢放咗幾耐啦。

同平時啲光酥餅唔同嘅係佢係整成一粒粒咁,個Size大概係一啖多啲啦,一兩啖就食完,唔會食到成地餅碎。味道正正常常,口感幾鬆化亦唔會太甜,當平價小食用嚟醫吓肚都好呀!

 

平霸小評:呢間老餅店長期咁好生意一定有佢嘅原因嘅,平霸覺得佢哋啲糕餅除咗價錢合理,質素真係有返咁上下。雖然臨近新年,舖頭依家主力賣一啲應節小食,蛋撻、雞仔餅呢啲小食要等過年後先再有得賣,但今次平霸食過呢幾款糕餅都好滿意,下次要再試埋其他!

奇趣餅家
地址:旺角花園街135號地下
電話:2394 1727
營業時間:星期一至日:08:00-20:00

 

You may also like...

Leave a Reply

Your email address will not be published. Required fields are marked *