【自家製賀年糕點陷阱多 營養師教你點整健康啲!】懶健康貼士

喺屋企自家製賀年糕點嘅朋友應該都search晒點整,自己控制分量,感覺上又健康啲。冇睇錯呀,係「感覺上」咋,自家製未必真係有營啲㗎,分分鐘自己調校嘅油、鹽、糖同食材嘅分量,比買現成食品更重手「足料」呀!想有個健康豬年係好嘅,但誤踩「自製健康啲」嘅陷阱就得不償失喇。依家慢慢話你知,落咩料同點整會真係健康啲啦。

 

蘿蔔糕

陷阱位:

臘肉同臘腸都屬於高脂高鈉食物,傳統臘腸每100克就有400-500千卡,差不多等於兩碗飯嘅分量,而當中有超過60%嘅熱量係來自脂肪;而臘肉比臘腸更邪惡,每100克臘肉就含有628千卡。有啲人為咗令糕點更加足料同甘香,反而加好多臘肉同臘腸,更加弄巧反拙。

建議做法:

1. 以全瘦臘腸代替傳統臘肉同臘腸,因為全瘦臘腸嘅熱量最多可以比傳統臘腸少一半。當然都要視乎牌子,所以記住留意營養標籤,盡量選購「全瘦」而唔係「加瘦」,因為加瘦都一樣有肥膏㗎!

2. 減少臘肉同臘腸嘅用量,加多啲冬菇、乾瑤柱、鮑魚粒一樣令蘿蔔糕有味又有口感㗎!

 

紅棗糕

陷阱位:

不論係白糖、紅糖或黑糖都屬於蔗糖,係由甘蔗而嚟,唔會因為轉用黑糖或紅糖就低卡路里啲㗎。不過佢哋精製程度唔同,所以礦物質含量同味道都唔同囉。

建議做法:

1. 將糖份減半,或以甜菊糖呢啲代糖取代部分糖分。

2. 紅棗屬水果類,本身亦含有天然果糖、纖維及抗氧化物,大家可以在減少糖的同時,可酌量增加紅棗嘅分量補償味道。

 

椰汁年糕  

陷阱位:

同紅棗糕一樣,大部分嘅食譜都寫要用好多糖,有啲食譜仲會加入椰汁,令年糕更香滑,但變相加入好多熱量囉。

 

建議做法:

1. 避免使用椰汁進入年糕,因為椰漿嘅飽和脂肪比較高,會增加患上心血管疾病風險。

2. 若想使味道及顏色更豐富, 可以用紫薯蓉製造部份年糕 (如:大紅大紫糕)及加入蒟蒻粉。紫薯含有豐富花青素,是天然抗氧化物,而紫薯蓉及蒟蒻粉亦是高纖維,幫助解決便秘。

3. 把糖份減半,或以代糖(如: 甜菊糖)取代砂糖或紅糖。

 

油角 笑口棗

陷阱位:

雖然自家製可以使用較健康嘅植物油取代傳統豬油,但係烹調方法都係由低温慢慢炸至上色,食物會在油鑊中逗留較長時間,會吸收過多油份。

建議做法:

1. 以氣炸鍋或焗爐取代傳統嘅油炸方法。

2. 減少餡料分量。

 

最後提提大家,即使自家製相對上比較健康,但係賀年糕點小食都唔可以當正餐㗎!最好係一件起、兩件止,咁就可以避免豬年過後變肥豬喇!

 

Moses Lee

現為“My Fitness”註冊營養師、澳洲營養及飲食治療碩士同澳洲營養師協會會員,擅長體重管理同運動營養。曾於醫院、社區中心、教會同非牟利機構等地方提供營養服務、舉辦營養講座同烹飪示範。現在為有需要控制體重嘅人士同運動員提供營養治療,制定飲食方案。

您也許也會喜歡…

發表迴響

你的電子郵件位址並不會被公開。 必要欄位標記為 *