【榴槤鹹蛋黃重口味邊爐 髒髒抹茶火鍋掀起熱潮】食焦

原來珍珠奶茶pizza同珍珠拉麵都未夠激,依家真係愈玩愈過界,呢種mix&match嘅新境界去到火鍋界別又會變咗點呢?係令人完全估唔到嘅都可以溝埋一齊,仲要放埋入口添!好似喺上海一間叫香天下嘅連鎖火鍋店,推出咗好多個千奇百趣嘅重口味湯底同估佢唔到嘅配料,引咗好多網紅同唔少食客去挑戰!好味定難食?有noise最緊要呀!

邊爐湯低有時都會飲吓半碗仔,不過變咗奶茶奶蓋湯底,真係好大挑戰!(上海香天下火鍋微博圖片)

之前香港都有榴槤雞煲,但係成個榴槤殼呀,問你怕未?(微博圖片)

髒髒抹茶火鍋係咁嘅樣!(上海香天下火鍋微博圖片)

宣傳聲稱係「可以喝的奶茶奶蓋火鍋」,咁有咩鍋底呢?登登登凳,有髒髒奶茶鍋、榴槤椰奶鍋、芋頭青稞鹹蛋黄肉鬆牛奶鍋、髒髒抹茶鍋,配料更加厲害,有OREO餅乾啦、鹹蛋黃啦、芋圓啦、珍珠啦同埋紫薯都有喎,總之喺茶飲店度見到嘅配料都可以加埋落去咁款!

暗黑料理火鍋出現喺眼前喇!好多塊OREO餅乾碎呀!其實仲有乜可以加落去?(上海香天下火鍋微博圖片)

鹹蛋黃乜乜乜嘅極致,原來係夾肉鬆配芋頭蓉湯底,真係睇見都覺又濃又重口味呀!(上海香天下火鍋微博圖片)

見到一鍋鍋抹茶火鍋加埋呢啲配料,鹹甜鹹甜咩味都有呀真係,每鍋盛惠138蚊人仔、差唔多160蚊港銀,但係連埋成個榴槤殼放埋落鍋度滾嘅榴槤椰奶鍋就唔同價喇,要258蚊人仔,圍起要成三百蚊港銀一鍋㗎!

肥牛淥落呢個杰撻撻嘅奶蓋湯底,唔知要淥快定慢先食得呢?(上海香天下火鍋微博圖片)

用飲管飲火鍋,打卡拍片必備?(微博圖片)

價錢嚟講唔算平,但喺強國都一樣掀起咗髒髒火鍋熱潮,成為微博熱搜同喺抖音度洗版,有唔少網民就話受不了呢個暗黑料理,連重慶人咁重口味都話受不了!有人就話寧願買杯奶蓋去食火鍋,為乜要飲奶蓋邊爐喎!講到咁hit,唔知有冇香港火鍋店想跟風呢?

呢間香天下火鍋一次過推出咗咁多重口味火鍋,真係搶晒頭啖湯聲勢!(上海香天下火鍋微博圖片)

髒唔髒?大家覺得呢?(上海香天下火鍋微博圖片)

You may also like...

Leave a Reply

Your email address will not be published. Required fields are marked *