【街市都食到米芝蓮大廚出品 滑蛋吉列豬扒神級頹飯】街霸

自從近年愈來愈多街市翻新,唔少創業人士都選擇喺街市開舖。今次街霸去到葵盛東街市入面嘅盧大師,老闆就係前米芝蓮二星餐廳嘅星級大廚,依家舖頭主打嘅菜式全部反樸歸真,超級貼地!

日常主食「粉、麵、飯」乜都齊,價錢相宜,唔怪得咁受街坊歡迎啦!

呢個滑蛋吉列豬扒飯(HKD35)超抵,大大兜飯,豬扒又大塊。滑蛋同洋蔥炒得恰到好處,滑蛋保持住些微水潤狀態,洋蔥咬落「嗦嗦聲」,送飯一流!

炸豬扒咬落好腍,炸皮酥脆,熱氣都要食呀!

街霸今次亦試咗呢個咖喱吉列蠔菜飯(HKD35),開頭見到「蠔菜」有少少黑人問號,後尾問老闆先知原來即係咖喱飯+吉列蠔+菜,棵菜大大棵夠晒綠,「頹飯」頹得嚟又幾均衡飲食喎。

隻蠔其實都幾大隻,三隻真係夠晒數。咬落仲幾juicy,唔會乾噌噌!炸皮同豬扒一樣酥脆,雖然蠔味唔算好驚艷,但食得出夠新鮮,呢個價錢食到三大隻蠔超值喇。

咖喱汁係日式feel,食落甜甜哋幾開胃;飯係用咗珍珠米,食落彈牙掛汁,超好味!

食完正餐到食甜品啦,原祖炸雪糕(HKD20)係盧大師嘅撚手甜品,即叫即整,5分鐘左右就食到!薄薄炸皮超級脆,包住凍冰冰嘅幼滑雪糕,冷熱交融,一定要試呀!

 

街霸最愛:今集最愛就係滑蛋吉列豬喇!滑蛋豬扒可能間間日本食店都有,一啲都唔稀奇,但要做得好食就真係唔多……往往基本嘢先係最難做得好嘛,難得酒店大廚屈身喺街市為大家提供平價美食,口味貼地,「頹」得嚟超晒班呀!點可以唔支持呢?

盧大師
地點:葵涌葵盛圍63號葵盛東街市小食街
電話:6734 5288
營業時間:星期一至日:10:00-21:00

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *