【內地小清新茶飲店攻港 雲石紋蛋糕奶茶顏值高】sofu

之前喜茶襲港搞到開幕嗰日排成幾個鐘先飲到咁誇張,其實想飲有驚喜嘅茶飲仲有其他好選擇嘅,不如試吓呢間新開嘅sofu啦!呢間茶飲店(梳芙)嘅發源地都係喺內地,之前集中喺二、三線嘅城市,最近就引入咗嚟香港,喺屯門開咗香港首間嘅代理店。論名氣梗係同喜茶冇得比,但實力其實有返咁上下㗎!sofu嘅茶飲相當有特色,除咗招牌水果茶,仲有比較少見嘅蛋糕系列,賣相同味道都冇得輸呀!

開喺商場地面嘅角落,位置都幾易搵,店舖行簡約清新路線,以白色為主,望落幾舒服。

呢度嘅蛋糕系列喺坊間比較少飲到嘅,小編就俾佢呢個雲石紋理嘅外表吸引到,對呢個系列好有興趣!呢杯蛋糕珍珠奶茶(HKD26/中)自家製新鮮現打蛋糕醬加入珍珠奶茶,蛋糕醬飲落好滑身好Creamy,有啲似食緊Cheese cake嘅感覺,同奶茶味道又好夾。珍珠比較煙韌,唔係好腍身嗰種,比較有咬口。

呢杯蛋糕靜岡抹茶(HKD26/中)都係熱賣之選。同樣以自家製嘅蛋糕醬做掛杯,配合抹茶嘅淡綠色,個紋理就再出啲,賣相攞滿分喇,唔知味道又點?第一個感覺係好有奶香,可能加咗蛋糕醬嘅關係,令到奶味再重啲,另外抹茶味都幾濃,似平時飲開嘅抹茶鮮奶,應該啱晒一眾抹茶控!

主打新鮮水果茶嘅茶飲店,又點可以唔介紹招牌金允烏龍水果茶(HKD35/大)呢?呢杯水果茶以四季春茶底,加入唔同橙片、菠蘿、西瓜同新鮮百香果肉整成,仲會用越南小青檸中和返成杯茶嘅酸甜度,所以飲落唔會覺得好酸,感覺會比較清新,聽講呢杯嘢有唔少男士捧場㗎!

呢杯紅柚綠妍(HKD33/大)最有驚喜!驟眼睇以為有奶蓋喺面,其實成杯係冇奶嘅成分,面頭係加咗蜜柚肉打成嘅冰沙,中間就係新鮮果肉。由於小編唔多鍾意苦澀味,所以一向對柚子冇乜好感,但呢杯所用嘅蜜柚冇平時西柚嗰種澀味,果肉比較甜身,配合茉香綠茶茶底,飲落幾有花香味,小編竟然話咁快成杯飲晒。

想飲奶蓋就可以試吓雪櫻烏龍奶蓋(HKD25/中),呢個雪櫻烏龍茶底真係有櫻花味㗎!花味比較突出,面頭嘅芝士奶蓋係落玫瑰鹽而唔用岩鹽,奶蓋相對上係冇咁鹹。飯後飲啱晒喇!

當然要照顧埋一班無黑糖不歡嘅朋友仔啦,糖髒髒奶(HKD28/中)入面個黑糖味夠香,以全鮮奶沖製所以好濃郁,唔會輸俾啲乜乜堂㗎!

sofu
地址:屯門鄉事會路83號V City地下G-16號舖
電話:2715 0633
營業時間:星期一至日:11:00-22:00

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *