【東北餃子店溫暖人情味 必點抵食煎餃+爆汁餡餅】平霸

冬天最啱就係食餃子喇!今次俾平霸喺土瓜灣發現到呢間興興餃子館,主要賣東北菜式,去得餃子館梗係要試吓啲餃子啦,餃子價錢賣緊32蚊10隻、40蚊15隻,煎餃同水餃都同價,又幾抵食咁喎,即刻試試佢先!

呢間餃子店開喺橫街,附近大多數都係車房,唔多起眼,而舖面亦比較細,入面得兩、三張枱。成間舖頭由兩位有北方口音嘅店員阿姐打理,由打餡、包餃、下廚到上菜都一手包辦。

呢碟煎餃(HKD40/15隻)拼咗三款口味,分別係三鮮餡水餃、椰菜木耳鮮肉餃同白菜鮮肉餃。餐牌係冇寫明可以拼唔同口味餃子嘅,但係平霸好奇一問之下,店員阿姐好好人咁真係可以俾平霸揀唔同款喎,所以如果想拼唔同口味,記得問多句呀!

煎餃全部都好香口,當中比較特別嘅係呢款三鮮餡水餃,包咗韭菜、蛋同蝦皮,冇落到肉嘅。蝦皮就類似蝦米咁,都係一啲曬乾咗嘅蝦,但蝦皮就係蝦嘅幼苗,蝦味都幾重,可以幫成隻餃提鮮。平霸喺坊間比較少食到,幾有驚喜!

再試埋呢度嘅水餃先,今次就嗌咗芹菜蓮藕鮮肉餃(HKD32/10隻), 水餃唔連湯上,個皮都算幾薄,包得幾靚,就算落過湯煮都冇咁易爆開。入面啲餡剁得幾細,芹菜味幾出,配埋蓮藕咁爽脆嘅口感,清清哋都唔錯。不過平霸就覺得水餃比煎餃遜色少少喇,冇咁惹味。

反而牛肉餡餅(HKD15)真係幾出色,一上枱嘅時候熱辣辣,個皮煎到金黃色,齋睇賣相已經流晒口水!切開睇吓,皮夠薄、牛肉餡都唔少喎,仲有肉汁流出嚟添。第一啖入口,食到好香嘅牛肉味,咬落嚿肉feel到好多肉汁,唔會乾噌噌好Juicy!不過自己一個食晒成件可能會覺得有啲膩,如果餡料加啲蔬菜就更好喇!

凡係食餃子或者麵食都會送杯豆漿,連豆漿都係自家製,豆味幾重,冇乜甜味,味道唔多似平時飲開嘅豆漿,有啲怪怪哋味喎,不過係送嘅,點都好過淨係得清水飲啦。

 

平霸小評:15隻餃子食到捧住個肚走先40蚊,計落一隻都唔使3蚊,連爆汁牛肉餡餅咁大件又好食都只係15蚊,算好滿足啦!值得一提嘅係,喺呢度食餃子除咗抵食飽肚,平霸仲食到人情味,事關店員阿姐好易話為咁俾客人拼多幾款口味餃子都得之餘,仲不時問使唔使幫忙翻熱等等,服務態度認真唔錯。仲有,餃子店開到夜晚12點㗎,啱晒夜貓子覓食!

興興餃子館
地址:土瓜灣浙江街27號地下G5號舖
電話:2311 9209 / 9829 2686
營業時間:星期一至日:11:00-00:00 

 

You may also like...

Leave a Reply

Your email address will not be published. Required fields are marked *