【又到渣馬!長跑女神講貼士 賽前「加碳」再補power gel】懶健康貼士

每年都有唔同嘅長跑比賽,近年最深入民心梗係渣馬啦,小編唔少朋友都有參加。每次見到朋友將練跑成績同路線開心些牙出嚟,不論跑咗幾多公里都令人佩服嘅,事關小編連1公里都懶得郁囉!咁其實練長跑應該要點準備呢?下個星期日又到渣馬喇,不如聽吓長跑教練Inez有咩建議啦!

「2015年因為一個運動品牌贊助我哋公司(模特兒公司),每星期有一日會安排教練帶我哋一班女仔跑步同體能訓練。當時我都係跑5-10km,都有跑過渣馬10km。可能因為我每次訓練都會去,個品牌覺得我應該幾鍾意跑步,就再贊助我去挪威跑OSLO Marathon 2015半馬(21.097km)。呢個係第一次跑半馬,真係跑得好辛苦,練咗兩個月左右,結果用咗2小時21分鐘,跑到腳抽筋咁滯,所以到依家都好佩服跑馬拉松嘅人。到2016年2月就喺Tokyo Marathon跑咗人生第一個全馬(42.195km),跑咗4小時58分鐘,衝線嗰吓嘅開心係冇其他嘢俾到你。人一世物一世,真係要試吓跑個馬拉松囉。呢樣嘢唔係求其就可以做到,你一定要好有紀律,如果想做時間就更加要努力添,我都喺當中學到堅持同意志力。」

Inez Leong Facebook 專頁圖片。

Practice Makes Perfect

「其實90%跑步嘅人一係受過傷、一係就受緊傷,甩腳甲都實試過,我依家都甩緊。我就好想知點樣可以正確咁訓練呢?於是完咗Tokyo Marathon就去台南,跟跑步教主Nicholas Romanov上跑步證書課程考證書。如果練全馬想練埋Personal Best(每次都快過上一次嘅時間),最少要4-5個月準備,而每日練習嘅內容都唔同。例如跑速度係一啲間歇性高強度嘅訓練,提升心肺機能同爆炸力;長課就係練耐力;另外仲有跑斜路、肌耐力等等。如果每日淨係跑幾公里,重複做一樣嘅嘢會難啲進步囉。每個星期其實跑3-4日,其他時間做吓肌肉訓練、TRX等等會平均啲。Practice Makes Perfect係一定㗎喇,所以訓練時間同內容就睇你想追求嘅係咩,因為我第一次跑步10分鐘已經唔郁得咁滯,但係慢慢隔日加長幾分鐘,反而一開始唔使追求速度,但記得要放輕腳步會冇咁易受傷。跑街的話最好有啲暗斜上落位,我就好鍾意由中山公園跑去金紫荊廣場,來回大約8km左右。」

馬拉松比賽前食咩好?

「如果10km比較快完成,就冇咩特別食物要準備。如果全馬就要跑之前3日『加碳』,即係食碳水化合物,早午晚都不斷食澱粉質去儲能量。我之前去跑芝加哥馬拉松差唔多食到嘔,早嗰幾日每餐都食兩碗飯,跑之前嘅一個鐘再食啲澱粉質,都差唔多夠力跑囉,同埋可以袋定啲power gel,每過8km就食一條。」

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *