【紅黑米即製健康高纖腸 觀塘石磨腸粉米香味濃】鳳鳴石磨腸粉

唔少人早餐都鍾意食腸粉,小編都唔例外,喺腸粉度加入唔同嘅材料就有唔同嘅風味,日日食都唔厭啦!小編知道觀塘有間新開嘅石磨腸粉店,即刻去試吓啦!呢間鳳鳴石磨腸粉用每日新鮮自家石磨嘅米漿整腸粉,石磨嘅好處係可以完整啲咁保存米嘅營養價值,腸粉就更原汁原味、更健康。除咗平日常見嘅白米腸,舖頭仲自創咗紅米同黑米腸添!紅米同黑米嘅纖維比白米多好多,以紅米同黑米磨漿整腸粉就更加有益喇。

「鳳鳴」即雞啼,意味住朝早嘅意思,舖頭希望打造一個健康早餐嘅概念。除咗早餐,其他時段都有唔少食客幫襯,舖頭地方唔大,可以選擇外賣或者立食。為咗支持環保,如果自備餐盒或用碟嘅每份腸粉仲會平1蚊添!

店員會先喺一格櫃桶蒸爐搽上油預熱,等一陣就倒上米漿,再加入唔同嘅配料攪勻,先放入爐蒸熟。由於蒸腸粉嘅蒸爐好似一格格嘅櫃桶,所以呢種腸粉又有「櫃桶腸粉」之稱。

呢款石磨蔥花蝦米腸(HKD19) 加雞蛋(+HKD3)用咗普通嘅白米漿整,加入蔥花、蝦米同雞蛋。雖然材料唔多,但已經有唔同嘅香味同口感,所用嘅蝦米比坊間嘅Size大,好有蝦嘅鹹香味,而且成碟腸粉有蛋香味,食到唔同嘅口感,冇咁單調。淋上舖頭煮過嘅豉油,同腸粉好夾又唔會過鹹。豉油仲會一直熱住,淋落去嘅時候就唔會整凍咗啲腸粉,好貼心呀!

用紅米漿整成嘅紅米羅漢齋腸(HKD23) 加栗米(+HKD3)有淡淡嘅紅色,仲可以見到有啲紅米嘅纖維。羅漢齋腸有冬菇、紅蘿蔔同木耳喺入面,再加埋粟米,成碟嘅顏色好豐富,賣相都幾討好。食落冬菇香味最出,仲有栗米嘅清甜味,蘿蔔絲同木耳絲口感好爽脆。

呢款顏色咁深嘅就係以黑米漿整成嘅黑米雞蛋豬肉腸(HKD25) 加蟲草花(+HKD5)喇!黑米腸喺坊間真係好少見,可能有唔少人見到佢咁黑嘅賣相會有啲抗拒,但黑米嘅纖維係三種米入面最高嘅,營養價值亦相對高。咁高纖嘅黑米通常要石磨兩、三次先會滑身,整出嚟嘅黑米腸都會見到明顯嘅黑米纖維,食落都幾滑身,仲有陣黑米嘅獨特香味添!

腸粉可以隨個人喜好加上炸蒜、辣椒、芫荽同芝麻。如果鍾意食辣嘅朋友仔一定要試吓呢度嘅辣椒乾,仲有個石磨俾客人自己磨辣椒粉,磨過嘅指天椒味會更香更出。不過提醒返,呢度啲辣椒真係幾辣㗎!

 

鳳鳴石磨腸粉
地址:觀塘開源道68號觀塘廣場地下G34號舖
電話:2488 6928
營業時間:星期一至日:08:00-19:00

 

You may also like...

Leave a Reply

Your email address will not be published. Required fields are marked *