【荃灣$4.5芝士撻平通街 $9大件黑森林切餅任揀】平霸

平霸去麵包舖除咗留意入面啲麵包夠唔夠平之外,仲會睇埋佢哋啲西餅甜品抵唔抵食㗎!呢間喺荃灣街市街嘅貝嘉餅屋啲西餅就逆市咁平,出面閒閒哋都十幾蚊一件嘅蛋糕切餅,呢度仲係賣緊9蚊,4個半銀錢嘅迷你撻都係熱賣之選!

喺轉角位嘅餅店有兩個門口,麵包舖嚟講環境唔算細。上午時段有唔少客人幫襯,更幾度大排長龍。

門口嘅蛋糕櫃入面竟然見到各式切餅只係賣緊9蚊一件,仲有成5款揀,點可以唔試吓佢哋呢?

呢件黑森林切餅(HKD9)望落好大件,上面鋪滿朱古力碎,朱古力碎係偏甜嗰種,蛋糕整得好鬆軟,朱古力味夠濃;忌廉都係朱古力忌廉嚟,中間嗰層同平時啲黑森林蛋糕一樣有啲提子啫喱,食落口感都幾豐富,抵食!

藍莓芝士切餅(HKD9)面頭嘅藍莓醬都幾多,冇用到新鮮藍莓整,係用比較甜嘅藍莓果醬,果醬本身都有少少藍莓肉,配埋蛋糕一齊食就中和返個甜味。蛋糕入口同樣都幾鬆軟,忌廉同蛋糕嘅比例啱啱好,唔太膩。雖然佢叫芝士切餅,應該係用咗忌廉芝士嚟整層Cream,但就唔係好食得出芝士味,平霸就覺得啲忌廉可以打得更幼滑,不過唔使10蚊就食到件Cake好滿意㗎喇!

呢兩款的的骰骰嘅係餅店熱賣嘅迷你撻。撻皮係平時食開嘅牛油撻皮,咬落去質感比較實在,搽咗啲朱古力醬喺撻皮上面,所以冇俾啲餡整腍個撻皮,食落依然係乾身脆口嘅。

淡啡色嘅迷你栗子撻(HKD4.5)有唧花造型,啲栗子蓉唧得幾高,唔會話得嗰兩圈。味道方面,食落都有栗子味,甜度適中,不過栗子蓉入面應該有溝到忌廉,唔係純栗子蓉。

白色脹卜卜嘅係迷你芝士撻(HKD4.5),面頭灑咗啲朱古力粉,呢款同坊間食到嘅芝士撻完全唔同,佢用咗忌廉芝士,食落芝士味唔係好出,但味道都唔錯,只係食晒成嚿會有啲膩。

 

平霸小評:一間餅店要經得起通脹嘅考驗真係唔易,9蚊一大件蛋糕嘅水準唔差,仲要賣得咁平,好難得㗎喇!4.5蚊嘅迷你撻可以買嚟過吓口癮,平時餅店仲有賣紫薯撻㗎,好受食客歡迎添,不過平霸嗰日去到就賣晒喇,惟有下次再試啦!

貝嘉餅屋
地址:新界荃灣荃灣街市街166號地下
電話:2615 1123
營業時間: 星期一至日:06:15-21:30

 

 

You may also like...

Leave a Reply

Your email address will not be published. Required fields are marked *