【元朗烤鴨片附送發霉麵皮 事主:黃膽水都嘔埋出來!】食焦

成日話眼不見為乾淨,咁擘大隻眼清清楚楚見到污糟嘢,咁好難話乾淨喇啩?好似呢位咁唔好彩嘅網友咁,喺元朗一間食川菜嘅餐廳霸王川莊食飯,叫咗碟烤鴨片,好例牌梗係會有埋一碟麵皮上埋枱,夾埋啲片皮鴨一齊食啦,點知見到塊皮上面有一點點嘢囉……

嘩啲麵皮全部一點點發晒霉咁好嘔心,有冇人同事主一樣以為係蔥花?(盡在元朗fb群組圖片)

事主4個人去咗呢間喺元朗嘅川菜餐廳霸王川莊食飯,埋單食咗$1188,因為發霉麵皮事件,餐廳全單免收,正常做法都係咁!(盡在元朗fb群組圖片)

「頭3片麵皮我們沒有看清楚就吃了,起初誤以為麵皮表面是蔥花」。事主將相po咗喺盡在元朗群組,睇見啲麵皮真係發晒霉咁款喎,好恐怖!估唔到事主竟然會以為係蔥花食鬼埋喎!事主仲話「昨晚肚子開始不適,每次想起發霉的麵皮黃膽水都嘔埋出來,我以後也不會再幫襯」。

即使換過一碟都唔會夠膽食啦!(盡在元朗fb群組截圖)

唔會有咁多蔥花啩?(盡在元朗fb群組截圖)

其他網友見到都話恐怖啦,又叫事主點解唔即刻叫食環報海關等等,有網友又話事主其實嗰晚餐飯唔使俾錢,又有甜品送又有100蚊禮券又滿意接受晒經理道歉,唔明佢點解刪完個po之後又要再po過出來,咁樣公審間餐廳唔係咁好!

有唔少網友留言話事主咁樣公審餐廳好唔啱喎!(盡在元朗fb群組截圖)

似乎餐廳本身評價都麻麻喎,有網友唔係食發霉麵皮,係幾乎食埋玻璃!(盡在元朗fb群組截圖)

輪到事主又回應喇,佢話唔係錢嘅問題,而係唔想再有人成為受害者啫,亦都希望呢間餐廳能夠以後做好嚴謹監管食物質素,唔好再有同類事情發生咁話!咁又真喎,連咁明顯嘅發霉麵皮都拎得出嚟俾食客,又真係要講出來等人警惕吓先得㗎!

事主回應。(盡在元朗fb群組截圖)

You may also like...

Leave a Reply

Your email address will not be published. Required fields are marked *