【排隊互毆 網上炒價急升 大陸瘋搶星巴克「貓爪杯」】食焦

喺偉大嘅強國土地,真係乜都有可能發生,更荒謬更離奇嘅事幾乎每天上演!今次係為咗一隻杯就搞到要大打出手又搶又爭喇,不過呢隻杯仔又確係幾得人歡心嘅,係抵爭嘅,不過唔使出埋拳頭囉!乜嘢杯咁巴閉搞到全城瘋搶?就係中國星巴克,咪即係STARBUCKS啱啱出咗呢隻「貓爪杯」搞到咁囉!

宣傳一出已經網上哄動,無論係咪貓控都想買返隻啦!(中國星巴克微博圖片)

倒埋啲牛奶落去,好得意嘅貓肉球現晒形喇!(網上圖片)

話說呢隻「貓爪杯」,係STARBUCKS為就快到嘅櫻花季節而推出嘅櫻花杯系列,中國星巴克呢,就喺26號推出咗呢款「櫻花貓爪杯」,喺官方微博一公佈啫,即刻引來轟動,有人仲漏夜搭埋露營帳篷喺店外霸定位排隊,由於每間分店貨量唔多,所以好多人都預咗要爭崩頭㗎喇!

開始郁手喇,兩個大男人為咗隻杯搶搶搶呀!(網上影片截圖)

由最初兩個人變到成班人圍埋打,花生友自然當戲睇啦!(網上影片截圖)

結果一出就斷貨,連喺現場排隊買嘅人都群情洶湧,有網民直擊咗現場情況放上網,見到喺其中一間分店就出現人龍大打出手爭杯嘅畫面,由最初得兩個人互搶,打打吓變咗成堆人喺度圍毆,仲將店內貨架上成排STARBUCKS杯推冧晒喎!

禍不及杯兒,仲要係唔關事嘅杯添!好無辜呀!(微博圖片)

紮埋營預備一開賣就搶呀!想知道個營主係邊個囉!(網上圖片)

呢隻「櫻花貓爪杯」官方售價係199人仔(約$233港銀),杯身係透明粉色嘅雙層耐熱玻璃,杯中間仲有cute爆「貓肉球」,如果倒啲嘢飲落去,「貓肉球」嘅形狀更加出,好難唔愛上佢啦!依家搞到一杯難求,益咗邊個?梗係班網上炒家啦,有網友話呢隻「貓爪杯」炒家炒高十幾倍都有,曾經出現3000人仔高價!真夠誇張!

補貨1000隻再斷,上星期將原本分3日嘅補貨,變為一日一次過開賣3000隻,都係即刻清晒!(中國星巴克微博圖片)

其他櫻花系列都有啫,但係全部唔夠隻貓爪揮囉!(中國星巴克微博圖片)

您也許也會喜歡…

發表迴響

你的電子郵件位址並不會被公開。 必要欄位標記為 *