【美式意菜推滋味蟹宴 必食原隻「膏蟹之王」】Mezzo

無論中式定西式蟹宴,對鍾意食蟹嘅朋友都有種魔力。喺尖沙咀嘅美式意大利菜餐廳Mezzo,最近推出期間限定蟹宴,由前菜、小食到主菜都有勁量蟹肉!最好係可以散叫,獨食都冇問題囉。

餐廳佈置營造出熱情同歡樂感覺,同朋友聚會就傾得更加暢快啦。蟹宴有八款菜式,下面呢四道菜就最誘人。

先嚟兩款同啤酒係絕配嘅菜式!香辣蟹肉焗薯皮(HKD118)喺薯皮入面填滿鮮甜蟹肉,配清新嘅牛油果同辣粉調味,面頭加啲芝士烤焗,滋味到想叫多份囉。

軟殼蟹迷你漢堡(HKD198)一份有齊辣椒、車打芝士同千島醬三款口味,一個人獨食不知幾正。

想食鮮味就有香草忌廉蟹肉闊條麵(HKD248),用鱈場蟹腳煮成,肉質幼嫩,鹹鮮味亦冇俾香草忌廉闊條麵蓋過。

最重點嘅蒸原隻麵包蟹伴香草牛油(HKD638)出場喇!有「膏蟹之王」美譽嘅麵包蟹,一定滿足到蟹迷把口。配埋用帶子、蝦同青口一齊煮成嘅海鮮湯,配香蒜法包真係食唔停口囉。呢啲菜式供應至4月30日,仲有個半月時間咋,快啲訂枱喇。

 

Mezzo
地址:香港尖沙咀麼地道71號富豪九龍酒店一樓
電話:2313 8778
營業時間:星期一至日:12:00-15:00,18:00-23:00

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *