【屯門親子自駕遊食勻四餐 環保「源 · 區」浸免費SPA】Local自駕遊

一有時間就想去遠啲玩吓,但喺香港揸車去邊啱一家大細放電?其實屯門唔錯喎。沿住龍鼓灘再揸上去會去到T · PARK [源 · 區]。呢度集轉廢為能、休閒活動同教育於一身,有導賞團帶大家了解呢度點樣接收香港11間主要污水處理廠嘅污泥,再轉化成能量;又有免費SPA俾市民享用,無論大人定小朋友嚟都可以加強環保意識;即使輕鬆啲純參觀,呢度都有大量打卡位㗎。唔講咁多,睇吓環境先,之後出返屯門市區,由下午茶一路食到宵夜!

T · PARK [源 · 區]有9,800平方米嘅戶外花園,包括2,800平方米嘅環境教育中心同雀鳥保護區,有機會見到小鸊鷉、翠鳥、苦惡鳥、蜻蜓同兩棲類動物添,淨係影相寫生都有排玩。呢度嘅電力自給自足,設計好開揚,陽光玩遊戲又呼吸埋新鮮空氣,值得嚟啦!

而焚化過程中產生嘅熱能就為「源 · 泉」設施內嘅水療池水加熱,市民可以預約免費使用添。置身熱水、温水同冷水嘅水療池,可以眺望后海灣一望無際嘅海景,唔使飛都放鬆身心啦。嚟呢度參觀一般預3個鐘或以上,視乎大家報咩活動啦,因為間中仲舉辦工作坊俾大家嚟玩㗎。

嚟之前記得喺到訪日期前3-30日內網上預約,提提報導賞團嘅朋友最好喺開始前15分鐘到達,因為逾時不候㗎。

場內分咗十個區域,而「源 · 茶」係自助茶館,提供簡單輕食,入面嘅桌椅同餐具都係用環保物料製造,切實教育點樣推動環保喎。

駕駛指南(請預約使用私家車停車場):
A. 沿皇珠路,往內河碼頭方向。
B. 請轉龍富路,往內河碼頭方向。
C. 沿龍門路,龍鼓灘路前住稔灣路。
D. 進入新界西堆填區後,左轉過橋,沿海旁向前行。
E. 從左邊第一個入口進入。

T PARK 源 區網站好細心,對應駕駛指南顯示埋地圖。

唔想揸到咁入的話,都有免費穿梭巴士服務來往屯門V city同T · PARK [源 · 區],每程車程大約30分鐘,記得預約呀。喺度玩完就近近哋出返屯門醫肚先。

 

T · PARK [源 · 區]
地址:屯門曾咀稔灣路 25 號
電話:2910 9700
營業時間:星期一、星期三至日:10:00-19:00
(圖片來源:T · PARK [源 · 區]網上圖片及影片)

 

抵食下午茶

下午茶三、四十蚊埋單係最理想嘅,呢間隱世平民拉麵店岡一拉麵最平只係HKD35就食到正常分量嘅拉麵,抖完行多陣街先出擊食晚餐都唔怕餓喎。

平價之選就係呢碗炸餃子拉麵(HKD35)!成碗麵有三隻炸餃子、半邊蛋,仲有木耳絲、蔥花同芽菜呢啲配料,望落都豐富嘅。湯底係豬骨湯,隻色幾奶白,但唔算好濃。咁平嘅拉麵冇得揀拉麵嘅軟硬度都正常嘅,麵質適中,唔太硬身,個麵底仲幾多。餃子炸得幾香脆,不過冇分開上就浸腍咗啲。餡料冇乜特別,同平時食嘅急凍餃子差唔多。

叉燒烏冬(HKD37)都幾抵食㗎,湯底除咗揀豬骨湯,仲可以揀辣湯,呢碗就係地獄辣湯。湯底嘅辛辣味係慢慢辣出嚟嗰種,唔似平時日本拉麵嗰種辣味,都幾過癮,不過對好辣嘅朋友仔嚟講就未必夠辣喇。同埋呢度啲拉麵全部都可以免費轉烏冬,烏冬比較粗身,都幾有咬口。

 

岡一拉麵
地址:屯門井財街9號錦發大廈地下1號舖
電話:2404 0832
營業時間:星期一至日:12:00-23:00

 

勁量晚餐

如果唔食tea,直接去Food Combo食晚餐都幾滿足㗎,每款定食都有主菜、餐湯、沙律、小食同新鮮水果,仲有免費無限添飲嘅自助水吧。

Combo F香煎挪威三文魚檸檬牛油汁配特式炸雞粒(HKD178)相對輕食啲,但有菇同薯蓉等配料,令三文魚更加香口惹味。

Combo D美國安格斯西冷(9安士)荷蘭汁配南瓜薯餅(HKD218)有大大塊西冷扒,加埋蒜片就更加香,食完一定大滿足呀!

 

Food Combo
地址:屯門鄉事會路88號The Parkville地下6號舖
電話:2511 1255
營業時間:星期一至四:11:00-21:30,星期五至日:10:30-22:00

 

飯後甜品

飯後食甜品是常識,嘆甜品出名整各式各樣嘅窩夫,不過仲有另一樣甜品同樣吸引喎。

就係大家鍾意嘅心太軟(HKD44起)呀!每隻味都跟唔同配料添,好想試勻晒囉。

 

嘆甜品
地址:屯門井財街15號金銘大廈地下4號舖
電話:3689 6865
營業時間:星期一至日:16:30-01:30

 

邪惡宵夜

開業一年多嘅區內小店很得輝小食嘅招牌美食都好邪惡㗎,不過呢度係慰勞家長多啲,因為好啱大人食呀!

招牌雞翼尖(HKD20)幾軟滑,令人食完一份又一份。不過最邪惡都係炸雞脾囉!

鎮店之寶嘅即炸雞髀(HKD30)好大隻,炸漿唔厚又鬆脆,如果想買走仲可以預早打電話落單添。咁樣又玩又食hea足一日,正呀!

 

很得輝小食
地址:屯門仁愛堂街50號金滿閣地下C2號舖
電話:9194 8386
營業時間:星期二至日:18:00-02:00(星期一休息)

You may also like...

Leave a Reply

Your email address will not be published. Required fields are marked *