【西貢遊車河玩埋免費航海體驗 歎海景BBQ+鹽田仔探秘】Local自駕遊

如果放假想遠離市區,去近郊或海邊唞吓氣,相信好多人都會諗起有「香港後花園」之稱嘅西貢,揸車嘅朋友就更加鍾意入去遊車河添。其實西貢都有好多值得去嘅地方㗎,等小編幫你安排行程啦,無論係一家大細定熱戀中嘅情侶,都有啱你哋嘅節目嘅,今個weekend揸車入西貢chill住玩返日啦!

一日限定!免費航海體驗

聽日入西貢又想體驗唔同嘅航海活動嘅話,去西貢白沙灣遊艇會航海訓練中心就啱喇!佢哋聽日(5月4日)免費開放俾公眾,年滿七歲嘅小朋友同埋大人都可以試玩小型帆船、獨木舟同直立板,仲有專業教練喺度親身示範添,有興趣就唔好錯過喇!

 

航海訓練中心公眾開放日
地址:西貢白沙灣西貢公路10.5咪
開放日期:2019年5月4日
開放時間:10:00-17:00

 

海傍打卡歎Cafe

每次入西貢必去西貢碼頭,既可以悠閒咁行吓海傍,附近又有唔少特色小店,仲有啲打卡位俾你影靚相添!

沿著萬年街行,會見到唔少呢啲咁有藝術感嘅壁畫。佢哋係由「藝聚西貢」同多個藝術家合作創作嘅,呢一幅就喺蘇珊娜牛扒屋外牆,行過記得欣賞吓再打卡喇。

行到餓餓哋,想搵間cafe食啲嘢?行簡約風嘅Little Cove Espresso環境開揚,不妨喺度感受吓慢活嘅生活節奏啦!

呢款雞腿肉開心果沙律(HKD105)健康之餘,仲分量十足喎

cafe有唔少菜式都加入地中海元素,呢款煙三文魚配酵母麵包(HKD88)就用咗中東獨特嘅香料調味,值得一試呀!

 

Little Cove Espresso
地址:西貢海旁廣場兆日樓地下1-2號舖
電話:9572 8560
營業時間:星期一至日:07:30-18:00

 

經過市場街呢間一起果醬,聽個名就知主打自家製嘅果醬啦。呢度亦果醬入饌,大部分食物都同果醬有關添。

View this post on Instagram

九官格吐司 九種不同果醬味道❤️

A post shared by Car_car🍭 (@car_car_tong) on

呢款九宮格多士(HKD49)係餐廳自創,搽滿佢哋九隻唔同味自家製果醬,可以一次過試勻晒好方便㗎。

 

一起果醬
地址:西貢市場街9號地下
電話:2791 9888
營業時間:星期一至五:10:00-20:00,星期六、日:09:00-21:00

 

坐街渡探秘

想完全遠離熱鬧嘅市區嘅話,可以喺,西貢碼頭搭街渡(船費HKD30-50)鹽田仔,船程大約15分鐘啫。1864年有傳教士嚟呢度傳教,陸續有村民受洗之後,當時嘅教友村民就捐出空地興建小聖堂同學校。最出名嘅聖若瑟教堂已經被列入文化遺產,紅頂白牆嘅教堂仲保存得幾好㗎。

鹽田仔渡口附近有呢間賣傳統客家茶粿嘅鄉誼茶座但記住呢度淨係開星期六、日,平日嚟就會摸門釘喇。另外,如果想食佢哋招牌嘅柴火土窖雞要提早預訂。

呢度嘅茶粿(約HKD8)勁多口味,有南瓜、紫心蕃薯、斑蘭呢啲甜茶果,亦有鹹嘅眉豆茶粿,口痕就賣兩個嚟食啦。.

 

鄉誼茶座
地址:西貢鹽田仔洲鹽田梓村3號地下
電話:9642 9603 / 9467 4448(預訂柴火土窖雞)
營業時間:星期六、日:09:00-17:00 (星期一至五休息)

 

兩大特色BBQ

搭船出返碼頭係咪得海鮮呢?厭厭哋嘅不如BBQ啦!

近近哋行10分鐘左右去沙灘嗰邊新開嘅西貢海灣會燒烤會所BBQ,地方超大㗎。除咗室外,室內嘅玻璃屋都可以望住個海食嘢,景觀一流呀!

一個價錢全日任食,食物種類都算多,喺度食足全日都得囉。

想食豪啲仲有得揀海鮮餐單(HKD588-1688),不過都係要提早預訂。

 

西貢海灣會燒烤會所
地址:西貢大網仔路沙下村9號地下
電話:2792 0683
營業時間:星期一至四:18:00-00:00,星期五:18:00-01:00,星期六:15:00-01:00,星期日:13:00-00:00

 

另一個BBQ推介就係呢間秘密花園燒烤場,食客都大讚食物質素夠高,環境仲好別緻添,由西貢碼頭揸車去大約15分鐘就到。

呢度嘅經典任食燒烤套餐(HKD200/成人,HKD140/小童)可以食四個鐘,有18款BBQ基本食物,好似丸類、雞翼、牛扒、秋刀魚等等。想食埋靚海鮮就可以揀極品海鮮燒烤套餐(HKD480/成人,HKD280/小童)

 

秘密花園燒烤場
地址:西貢蠔涌路88號成豐片場地下
電話:5290 0515
營業時間:星期一至日:13:00-00:00

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *