【新推飛驒牛十二道風味 冠軍和牛滑不留口】權八居酒屋

喺日本冠軍級和牛之中,­飛驒牛肉味幾濃郁,脂肪甘香又唔會食到成口油,好多香港人都鍾意食。銅鑼灣權八居酒屋嘅大廚顏錦輝師傅經常去日本搵優質食材,所以今期推出十二道­飛驒牛料理俾大家食得盡興!師傅遠赴岐阜縣飛驒高山地區引入食材同鄉土料理,當然亦有傳統加創意菜式啦。呢個系列暫定推出三個月,即刻睇吓其中嘅特別款式先!

餐廳環境極之氣派,配襯冠軍和牛絕對係perfect match!

先嚟清香啲嘅飛驒牛蒸籠理(HKD688),用幾款蔬菜同­飛驒牛一齊蒸,令肉味更加清甜。

想濃味啲有兩個選擇,呢個鄉土料理飛驒牛味噌朴葉燒(HKD228)係飛驒高山當地最具代表性嘅菜式 。將日本厚朴樹嘅葉放喺鍋底,加入濃郁而帶甜嘅味噌、大蔥、香菇、豆腐同飛驒牛。煮嘅時候將朴葉獨有嘅香氣滲入食材,做下酒菜或者配飯食都得。

大路啲有味道稍甜嘅飛驒牛壽喜燒(HKD688),不過將牛肉蘸上蛋漿一齊食,口感真係滑不留口囉。

至於壽司都有幾款,火炙飛驒牛珍寶壽司(HKD188)輕炙後迫出少少油香,令和牛更加惹味香滑。

三色和牛壽司係高山老街嘅名物,所以餐廳設計咗白川鄉三色和牛壽司(HKD328)。右邊生牛肉手握壽司簡單以鹽提味,食到最原始嘅牛肉鮮味;中間嘅炙燒飛驒牛掃咗醬汁,再落蔥花同薑蓉令味道層次更豐富;左邊嘅飛驒牛軍艦就喺牛肉條上淋蛋黃醬,令肉質更幼滑。

炭燒一口飛驒牛伴三色鹽(HKD198)燒到五成熟,咬落去勁多肉汁仲有輕微炭香。另外配咗三種味道嘅海鹽同檸檬汁,俾你試到唔同風味。

創新啲嘅有飛驒牛薯蓉鍋巴(HKD198),喺香脆嘅日本炊餅上放咗薯蓉同汁煮飛驒牛,配埋秘製燒汁同沙律醬好惹味喎。

感覺西式啲嘅飛驒牛味噌芝士薄餅(HKD198)其實係權八招牌和風薄餅嘅變奏版。用日式餃子皮做餅底,掃上一層薄薄嘅味噌,再落飛驒牛、蕃茄等材料,最後喺面加芝士條焗到金黃色,食嘅時候蘸特製辣油會更加過癮!

飛驒牛免治吉列棒伴溫泉玉子(HKD78)將免治飛驒牛混入雞軟骨,沾上小麥粉同麵包糠炸到金黃色,淋上燒汁灑埋蔥花好香脆又有咬口。

餐廳仲特別推出五款來自高木酒造旗下嘅十四代清酒(HKD390/180ml,HKD3,980/1.8L)
1. 本丸 生詰 特別本醸造
2. 吟醸 吟撰 播州 山田錦
3. 角新 純米吟醸 生おりがらみ 荒走り
4. 角新 出羽燦々 本生 純米吟醸
5. 槽垂れ 本生原酒 純米吟醸

邊食­飛驒牛邊飲清酒,係味覺一大享受囉!

 

權八居酒屋
地址:銅鑼灣希慎道33號利園一期4樓
電話:2787 3688
營業時間:星期日至四:11:30-23:30,星期五、六及假期前夕:11:30-00:00

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *