【錦田自駕遊玩咖啡工作坊 必到壁畫村打卡談心】Local自駕遊

拍拖又係行街睇戲食飯就out喇,依家梗係去啲打卡位,上吓workshop,或者去郊外地方玩吓,最後先食餐好啦。今次等小編帶大家去錦田遊一圈啦!

文青之選

CoHee可以話開喺村屋入面,感覺好似去咗日本小區咁。

除咗喺度歎杯咖啡或者買相關用品,都有啲輕食俾你醫肚。五款吐司及雜業沙律(HKD78起)可以配農村包或法式拖鞋包,

如果你都想深入啲學沖杯靚咖啡,呢度仲有唔同嘅咖啡烘焙、咖啡沖泡workshop(HKD380/起一位)

 

CoHee
地址:元朗錦田市街152號地舖
電話:6344 5575
營業時間:星期二至日:11:00-19:00(星期一休息)

 

親親大自然

有機薈低碳農莊以菠蘿為主題,可以參觀菠蘿園(HKD60/位,平日四人成團)之外,都可以即場買唔同嘅菠蘿食品,或者參加workshop自製㗎。

新鮮菠蘿、雪糕菠蘿包、菠蘿雪糕等等都有得食,部分可以單買,有啲就跟工作坊包埋。


如果想帶埋寵物去就睇清楚注意事項喇:
1. 攜帶寵物進入農莊請做好自主管理並協助維護清潔即可。
2. 狗隻必須領有牌照,並需同時為狗隻進行防疫注射及植入微型晶片。
3. 為方便識認,請為寵物準備名牌(註明寵物名稱及主人電話號碼)。
4. 請注意自己的寵物盡量在自己的視線範圍內,大型狗隻必須帶上口罩及牽引繩子。
5. 請隨即清理其寵物的排洩物,以免妨害公共衛生。
6. 農莊沒有提供任何寵物糧食售賣,請自備所需。
7. 若因你所攜帶的寵物構成人身安全、公共衛生、破壞公共秩序或足以危害其他客人安寧時,如經職員勸阻無效,本農莊會保留請您與寵物離開的權利。

 

有機薈低碳農莊
地址:錦田錦河路四排石村
電話:5579 2178
營業時間:星期一至日:10:00-18:00

 

打卡熱點

錦田壁畫村係由一班義工喺吉慶圍建設一條壁畫村,令社會更加共融互助。留意佢哋Facebook,有時會開導賞團介紹壁畫添。

呢幅準備中嘅似係中秋節主題喎。

有時仲會邀請大家一齊畫。如果星期六、日嚟,可以行埋附近嘅紅磚屋市集,都有唔少特色舖頭㗎。

 

錦田壁畫村
地址:錦田吉慶圍(錦田公路側)

 

古法私房菜

入到嚟錦田堂然試吓懷舊菜啦,今次介紹兩間私菜俾大家。紅磚屋十號私房菜主打懷舊粵菜,掌廚嘅蘇師父有四十年多經驗,佢嘅古法鹽焗雞同百花煎釀蟹鉗都好多人鍾意食㗎。呢度有免費停車場,嚟之前記得訂位喇。

 

紅磚屋十號私房菜
地址:錦田錦上路祠堂村錦上路紅磚屋側
電話:6234 7388
營業時間:星期四至二:18:00-23:30(星期三休息)

 

特色農家菜

出返遠啲去創機薈信譽農莊就有農家菜食,同樣嚟之前記得訂位。如果中午都嚟仲可以摘士多啤梨、蕃茄等時令蔬果,同可愛嘅羊咩咩同兔仔玩又得啫。

 

創機薈信譽農莊
地址:八鄉錦上路大窩村DD113號
電話:5942 4875
營業時間:從缺

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *