【藝人踩過界麵店愈開愈多 包辦港台西日熱門麵食】大茶飯、一君士多、麵麵店、FOODO、阿久根拉麵屋

好多藝人都殺入飲食界開餐廳做老闆,其中有唔少係開麵店添。小編盤點近期開嘅五間人氣明星麵店,間間都有特色,而且港、台、西、日嘅熱門麵食樣樣齊,睇埋落去就出發搵食啦!

 

黃美棋:大茶飯

上個月將軍澳新開嘅大茶飯係藝人黃美棋(美棋BB)同拍擋夾份開嘅台式餐廳,佢仲揚言會親身落舖幫手添,以後多個地方可以見女神一面喇。餐廳logo其實係麵條形狀,暗示呢度主打做麵食,記得要試呀!

佢哋嘅台式自選車仔麵有新竹米粉、台灣麵、養生健康淮山麵等共九款麵底可以揀。其中招牌拌麵「17歲的麵」(HKD23起)有大大塊花膠,同時希望以辣辣哋嘅麵底代表17歲無畏嘅感覺。

 

大茶飯
地址:將軍澳唐德街9號將軍澳中心1樓137B號舖
電話:2350 1628
營業時間:星期一至日:11:00-23:00

 

鄧一君:一君士多

油麻地總店

由藝人鄧一君(香蕉仔)主理嘅一君士多喺油麻地開業唔夠半年,上個月啱啱又喺尖沙咀開分店。新店嘅店面比總店更大、有舒服嘅座位,俾客人慢慢歎佢哋嘅招牌車仔麵。古天樂都現身支持,唔知去邊間可以撞見男神呢?!

車仔麵嘅餸料選擇夠多,幾款招牌麵食嘅用料仲夠晒高級添。其中嘅霸王麵(HKD98)有齊鮑魚、花膠同桶蠔,呢啲靚料仲要打孖上㗎!

 

一君士多
地址:尖沙咀堪富利士道6號地舖
電話:2673 1688
營業時間:星期一至日:11:00-23:00

 

小儀:麵麵店

多棲發展嘅小儀喺2012年開始合資開嘅車仔麵店麵麵店,最近又喺將軍澳開新分店喇!

呢度主打車仔麵(麵底HKD14起),有成50款餸料俾你配搭,其中麻辣蓮藕(HKD9/4件)咖喱魷魚(HKD12/3件)都係呢度必食㗎!

 

麵麵店
地址:將軍澳貿業路8號新都城中心一期2樓241, 250-251號舖
電話:3996 8937
營業時間:星期一至日:07:00-22:00

 

林秀怡:FooDo

最近喺劇集《婚姻合伙人》表現突出嘅林秀怡除咗喺演藝事業上拼搏之外,仲喺上年同閏蜜夾份開咗間手工闊麵餐廳FooDo

店內食到嘅闊麵都係自家手製,由搓粉獎成麵條少啲氣力都唔得。佢哋啲闊麵嘅質地比一般闊麵厚身少少,食落有啲煙韌而唔係好麵粉嘅感覺。呢味忌廉汁自家製醃肉及日本生雞蛋配手製闊麵(HKD81)層次感好豐富仲非常掛汁添,果然係心機菜呀!

 

FooDo
地址:旺角通菜街1A-1L號威達商業大廈地下C號舖
電話:9016 6327
營業時間:星期一:12:00-15:30;18:00-22:00;星期三至日:12:00-15:30;18:00-22:00

 

李泳豪:阿久根拉麵屋

鼎爺仔仔李泳豪因為鍾意食牛,開咗阿久根和牛立燒店都唔夠,早排開埋阿久根和牛拉麵屋,要將高質嘅和牛麵食分享俾大家咁話。

拉麵屋主打嘅慢煮A4和牛•雞白湯沾麵(HKD128)以肉質鮮嫩嘅A4西冷和牛代替叉燒,醃製後低溫慢煮八個鐘㗎;煮到約兩、三成熟就煨日式叉燒汁,入味又充滿肉汁。配上熬咗廿個鐘嘅奶白色雞白湯,湯頭濃郁唔油膩,係呢度嘅必試首選!

 

阿久根和牛拉麵屋
地址:旺角廣華街13號廣輝大廈地下1號舖
電話:2388 5468
營業時間:星期一至日:12:30-15:00、18:00-22:00

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *