【下午茶歎20cm巨型魚柳包 香脆厚肉大過手掌】平霸

下午茶食乜好?平霸今次同大家深入柴灣嘅澤記快餐飯店,一嚐吸引唔少人下午茶食嘅King Size魚柳包同雞扒包!28蚊一個茶餐配埋熱飲,兩點開始供應,食個late lunch都夠飽肚㗎。即刻睇埋落去啦!

呢間澤記快餐飯店喺正馬路隔離,好似啲大排檔咁開揚,個Feel都幾地踎吓,係附近街坊嘅平價飯堂嚟。

除咗魚柳包同雞扒包之外,下午茶仲有其他包款揀㗎,全部一律28蚊連一杯熱飲!

嘩!呢個巨型魚柳包(HKD28)真係冇改錯名,大過小編隻手好多,度一度塊魚柳有成20cm長㗎!入面夾咗生菜同蕃茄,仲有兩種醬汁,口感同味道層次幾豐富。麵包烘底後脆卜卜,更加加分添。

成塊鱈魚柳都好厚肉,炸到外層鬆脆入面嫩滑。而醬汁落得幾多,個包唔會乾噌噌,有驚喜!

叫得澤記雞扒包(HKD28),證明雞扒都係呢度嘅招牌嚟。煎香咗嘅雞扒同樣都係大大塊,包嘅餡料同醬汁就同魚柳包一樣。

塊雞扒煎得夠香之餘仲好juicy,不過醬汁就略嫌多咗啲,底嗰塊包浸腍咗少少。

跟餐嘅熱飲就嗌咗奶茶,茶底都幾香濃喎。聽啲姐姐講沖嗰陣加咗蜜糖,唔怪得口感厚身啲啦。

 

平霸小評:其實柴灣區都有唔少好嘢食㗎,呢間澤記快餐飯店就係其中一個好例子喇!呢度嘅魚柳包同雞扒包上枱時真係俾佢嚇咗一跳,大份到胃口細啲都未必食得晒。仲要佢哋唔係淨係得個樣,吉列魚柳個外皮夠脆之餘,入面啲魚柳肉仲好厚身;雞扒又夠嫩滑juicy。唔怪得回頭率咁高,下次再嚟試埋其他包款先!

 

澤記快餐飯店
地址:柴灣吉勝街10號熟食市場
電話:2556 7686
營業時間:星期一至六:06:00-17:00,星期日休息

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *