【千両新Menu鮮味爆棚 松葉蟹飯鋪滿蟹肉蟹膏】千両

踏入夏天,千両都轉轉新menu幫大家換吓口味,唔少菜式用咗日本松葉蟹腳、蟹肉、蟹膏同黑飛魚籽添。仲有限定供應至6月下旬嘅豐洲魚鮮料,出動咁多海產,即刻睇吓邊樣鮮味到爆棚啦!

先介紹三款豐洲魚鮮料,首先有將矜貴嘅鯛魚薄切成刺身,配上三文魚籽、飛魚籽、沙律菜同水菜變成鯛魚沙律配巨峰提子芝麻醬油沙律汁(HKD78),加埋巨峰提子同和風芝麻醬油調味仲更醒胃添。

帶子壽司三點盛(HKD78)係用帶子配三文魚籽、馬糞海膽同黑飛魚籽,唔同層次嘅鮮甜味更加打開味蕾。

試完冷盤仲有熱食嘅海鮮寄世鍋(HKD158)。濃郁嘅帆立貝海鮮湯底熬煮豐洲鯛魚、蠔、帶子、各類蔬菜同菇類,味道清香,食多啲都唔會滯。食咗豐洲魚鮮料理都唔好走住,佢哋嘅主餐牌都有新菜㗎,等小編介紹幾款俾大家啦!

日本松葉蟹迷你壽司飯(HKD60/份)喺柔軟清甜嘅宮城縣壽司飯上面,鋪滿日本松葉蟹腳、蟹肉、蟹膏同黑飛魚籽,加埋一齊係勁濃嘅海鮮味!

鍾意蟹嘅朋友要試埋有齊日本松葉蟹肉、濃香蟹膏同三文魚籽嘅日本松葉蟹肉味噌伴脆餅(HKD78)。味道鹹香,佐酒唔錯喎。

想食肉嘅就有和牛蒸籠(HKD188)選用鹿兒島和牛肉眼部位,以黃菜同甘荀花蒸製八分鐘後再放上和牛肉,咬落有肉汁又帶陣清香嘅感覺。

飯後當然食甜品啦!上林春松 – 抹茶卷蛋(HKD58)用來自有450年歷史嘅宇治の老舖茶舖嘅抺茶,分別整成鬆軟綿密嘅抺茶卷蛋包住幼滑嘅抹茶忌廉、口感煙韌嘅抹茶糯米糍、抹茶蕨餅。

 

千両
地址:九龍灣偉業街33號德福廣場一期F27號舖
電話:2795 2808
營業時間:星期一至日:11:30-22:30

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *