【日本三大便利店逐間睇 搜羅6款必食新品】7-Eleven、LAWSON、FamilyMart

日本食好西其中一個節目就係入便利店尋寶喇!皆因當地便利店出新品嘅速度特別快,而且質素有保證,有時吸引到風靡全亞洲添!日本嘅7-ElevenLAWSONFamilyMart最近有唔少自家品牌嘅新品,有啲今個月開賣冇耐就已經人氣爆燈,睇埋落去list定你嘅必買清單啦!

 

Uchi Café × GODIVA車厘子朱古力系列

朱古力同車厘子都係最佳拍檔嚟㗎!LAWSON旗下嘅Uchi Cafe再次聯乘人氣朱古力品牌GODIVA,啱啱新推嘅車厘子朱古力甜品系列有蛋糕同窩夫兩款。

車厘子朱古力蛋糕(連稅415円/約HKD30)外層嘅車厘子海綿蛋糕包住入面嘅朱古力忌廉,面頭塊GODIVA朱古力當然濃郁又順滑啦。

車厘子朱古力窩夫(連稅350円/約HKD25)就有粒糖漬車厘子喺朱古力忌廉入面,都係LAWSON唔可以錯過嘅新品!

 

銷售點:日本LAWSON獨家發售
銷售日期:6月10日起
圖片來源:IG@katy.days、IG@akiko_lawson

 

7-Eleven抹茶系列

7-Eleven喺上個月尾出咗呢款自家品牌宇治抹茶忌廉麻糬(連稅350円/約HKD8),一盒有三粒,一啖一粒。麻糬面頭鋪滿抹茶粉,入面就有唔少抹茶cream,煙煙韌韌又夠濃味。

另外,呢款抹茶忌廉銅鑼燒(連稅300円/約HKD21)都係近期嘅大熱新品,中間嘅抹茶忌廉有成5cm咁厚,好似雪糕咁嘅質感。不過呢款係凍食嘅,買咗就即刻開封啦!

 

銷售點:日本7-Eleven獨家發售
銷售日期:即日起
圖片來源:日本7-Eleven官網、IG@matchakochan、IG@saya.33k

 

FamilyMart芝士蛋糕雪條

踏入初夏又點少得冰品呢?FamilyMart竟然將芝士蛋糕變成雪條,呢款芝士蛋糕雪條(連稅198円/約HKD15)用咗忌廉芝士、車打芝士同高達芝士三料製成,所以味道特別香濃!既有雪條嘅冰凍口感,又有芝士蛋糕咁厚實幼滑,簡直係雙重享受呀!

 

銷售點:日本FamilyMart獨家發售
銷售日期:即日起
圖片來源:日本FamilyMart官網

 

可口可樂碳酸青檸梳打

繼透明可樂之後,可口可樂喺今個夏天又出新品喇!呢款碳酸青檸梳打(連稅140円/約HKD10)酸酸哋嘅青檸味加埋有氣嘅碳酸梳打,夏天飲一定爽晒啦。

 

銷售點:日本各大便利店有售
銷售日期:6月10日起
圖片來源:可口可樂日本官網

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *