【$17脆炸雞髀下午茶超抵食 配奶油多送香檸薏米水】平霸

依家去大乜乜食個下午茶都要廿幾三十蚊,但竟然俾平霸搵到個17蚊嘅炸雞髀下午茶餐,一於帶大家嚟到天水圍嘅金裝燉奶佬餐廳食個tea,睇吓係咪大件夾抵食先!

呢間係喺商場嘅地舖,位置非常當眼,一落輕鐵就會見到。入面舖面都幾大,有成五、六十個位。

平霸見佢門口有張海報寫住有17蚊嘅茶餐喎。呢個期間限定嘅優惠原來係慶祝新店開業而做嘅,逄星期一至五14:00-18:00都有得供應,不過只限堂食,冇得外賣㗎。

成個優惠茶餐(HKD17)有一隻懷舊炸雞髀、奶油多士同一杯香檸薏米水。賣相望落都幾靚仔喎,分量就正常茶餐咁啦,下午茶時段食啱啱好。

烘底多士就得半塊,不過幾厚身,面頭落咗煉奶同牛油,食落脆卜卜添。

懷舊炸雞脾係生炸嘅,雞皮炸到金黃色,仲好脆口。啖啖肉嘅雞髀幾時都咁正嘅,咬開入面啲肉幾鮮嫩又滑身,認真唔錯!

跟餐送一杯香檸薏米水,轉凍飲都唔使加錢。依家天氣咁熱,飲完即刻降溫同清熱袪濕。薏米分量幾多,不過檸檬幾搶味,似飲緊檸水,但勝在有啲咬口囉。如果唔想飲薏米水,都可以免費轉其他熱飲㗎。

 

平霸小評:出去買隻炸雞髀起碼都要十幾蚊啦,依家17蚊就有成個雞髀茶餐,又炸得皮脆肉嫩;烘底奶油多脆卜卜;薏米水又大大杯真係好抵。啲食物質素有返咁上下,唔會因為做優惠而影響質素。不過聽講呢個優惠茶餐係期間限定,未知幾時完,想食平價茶餐就要快喇!

 

燉奶佬
地址:天水圍天湖路1號嘉湖新北江商場A182-A186及A198-A200舖
電話:2445 6321
營業時間:星期一至日:06:30-00:30

You may also like...

Leave a Reply

Your email address will not be published. Required fields are marked *