【Mango Tree推全新地道泰菜 鮮蝦脆炸粉絲香酥惹味】Mango Tree

講到香港人鍾意食嘅菜系,點可以唔提泰國菜呢?!要食到地道風味,去來自泰國嘅Mango Tree都唔錯㗎。佢哋喺圓方分店重新回歸之後,推出咗一系列新菜式俾啲新鮮感大家咁話喎。依家睇住部分新菜啦!

前菜梗係要嗌拼盤,樣樣都食到先夠滿足㗎嘛!呢個泰式小食拼盤(HKD368/3-4位用)裡面有炭燒豬頸肉、斑蘭葉嫩雞卷、泰式炸蝦餅、泰式炸魚餅同軟殼蟹米紙卷五款泰式小食。其中斑蘭葉嫩雞卷係以泰國斑蘭葉包住去骨雞髀肉再生炸,食落充滿肉汁又有淡淡斑蘭香味。

想試傳統啲嘅泰菜,就可以試吓呢款鮮蝦脆炸粉絲(HKD128)。將加咗蒜頭、泰式是拉差醬、酸子等配料嘅大頭蝦肉同粉絲炸到脆卜卜;再撈埋炸蛋絲,食落爽脆惹味,配埋芽菜一齊食又可以減低油膩感添。

今次新推嘅菜式入面,黃咖喱炒阿拉斯加蟹腳(HKD538)係其中一個亮點。阿拉斯加蟹腳肉質飽滿鲜味,食落啖啖肉,配埋Mango Tree招牌黃咖喱就夠晒惹味喇,撈飯一流呀!

而呢款清邁名菜泰北亨利鴨(HKD188)雖然同樣係咖喱 ,但冇落椰漿,反而以菠蘿、薑絲做調味;鴨肉都煮得軟腍入味喎。

青芒果燒雞沙律配黃金糯米飯(HKD128)係一道比較新式嘅泰式料理,雞肉用蜜糖、麥芽糖同多種泰式香料調味後再炭燒。配埋清新爽口嘅青芒果沙律;仲有炸到外脆內軟嘅糯米飯,入面包住金黃嘅鹹蛋黃添,口感同味道嘅變化夠晒特別。

諗起泰式甜品就梗係芒果糯米飯同斑蘭糕啦,泰式甜品拼盤(HKD198)有齊晒之餘,泰式斑蘭千層糕同椰汁西米糕都係自家製,仲有新創嘅椰香糯米球添,食晒真係夠圓滿喇!

 

Mango Tree (圓方店)
地址:​九龍柯士甸道西一號圓方2樓2032號舖
電話:2668 4884
營業時間:星期一至日:11:30-23:30

You may also like...

Leave a Reply

Your email address will not be published. Required fields are marked *