【深入茶果嶺探索老香江風情 三家村睇日落歎九味海鮮】Local自駕遊

假日想感受吓老香港風情,當然要去吓茶果嶺村三家村呢啲少被市區發展影響嘅地方啦!唔止影相打卡靚,又可以食到肥美海鮮,快啲帶埋部相機跟住小編起行啦!

 

輕食早餐 鳳鳴石磨腸粉

入去茶果嶺村少不色免經過觀塘,如果朝早先出發可以喺度買份健康早餐醫飽肚。

觀塘廣場入面嘅人氣腸粉店鳳鳴石磨腸粉,每日新鮮自家石磨米漿,除咗常見嘅白米腸,仲自創咗紅米同黑米腸添!呢兩款嘅纖維比白米多好多,更加有益㗎。

用紅米漿整成嘅紅米羅漢齋腸(HKD23) 加栗米(+HKD3)有淡淡嘅紅色,仲見到啲磨到好微細嘅紅米粒粒。呢款餡料有冬菇、紅蘿蔔同木耳,另加嘅粟米都唔少,成碟顏色好豐富,賣相都幾討好。食落冬菇香味最突出,仲有栗米嘅清甜味;蘿蔔絲同木耳絲就令口感好爽脆。

 

鳳鳴石磨腸粉
地址:觀塘開源道68號觀塘廣場地下G34號舖
電話:2488 6928
營業時間:星期一至日:08:00-19:00

 

紀錄舊時代 茶果嶺村

茶果嶺村喺油塘同藍田之間,由觀塘揸車入去唔使十分鐘,但一到去就好似去咗另一個世界咁。入面大部分都係寮屋,有唔少已經荒廢咗,不過吸引唔少影相發燒友嚟取景,紀錄或見證香港嘅舊時代。

雖然依家成條村熱鬧不再,但多咗好多貓喺度聚居,到處都見到呢啲貓仔嘅蹤跡。

行到攰可以去村入面有成五十幾年歷史嘅榮華冰室食個tea,呢度仍然保留唔少舊式裝潢陳設,有懷舊吊扇、手寫餐牌、雅座等等。依家呢啲舊式冰室已經買少見少,周末喺度感受吓舊日嘅情懷都係一個唔錯嘅選擇嚟㗎。

呢度啲食物全部都賣緊街坊價,餐蛋麵(HKD18)就夠晒抵食,太陽蛋煎完仲好流心㗎。西多士(HKD15)啲蛋漿沾得夠多,炸出嚟外脆內軟,唔怪得咁受歡迎啦。

 

榮華冰室
地址:油塘茶果嶺大街106號A
電話:2349 1340
營業時間:星期一至日:07:00-17:00

 

歎高質靚海鮮 三家村

由茶果嶺往油塘方向再揸車入鯉魚門三家村,同樣唔使十分鐘。沿海嘅三家村附近係避風塘,碼頭附近有好多漁船停泊 ,仲有個小石灘、舊礦場同燈塔,影日落一流。

海邊嘅天后古廟有成二百幾年歷史,被列為香港三級歷史建築,係鯉魚門嘅地標之一。有啲釣魚嘅朋友會嚟呢度,輕輕鬆鬆垂釣一日不知幾寫意。不過嚟到呢度,梗係食埋海鮮大餐先夠圓滿啦!

喺三家村渡輪碼頭附近嘅三家村水產全店有成三千幾呎,客人仲可以邊歎海鮮邊欣賞維港嘅無敵大海景,真係一級享受呀!餐廳設有水產區,每日有唔同嘅時令海鮮俾客人親自挑選。

除咗單點海鮮之外,都可以嗌餐廳精選嘅海鮮餐。其中呢款巨型豪華活海鮮盛(HKD1980/4人份)夠晒豐富,廚師會用九種煮法炮製入面嘅活海鮮。以龍蝦、鮮蚌、北海道真蠔會整成剌身再配幾款醬料;亦有黑松露雜菌炒鮑魚、清酒煮蕃薯蜆、山椒麵豉炒彩貝等熟食,保證令你試到海鮮嘅鮮味之餘仲充滿驚喜添。

 

三家村水產
地址:油塘鯉魚門崇信街三家村渡輪碼頭東翼
電話:2660 8798
營業時間:星期一至五:17:30-23:30,星期六、日:14:00-23:30

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *