【五大精選燉湯店足料夠火喉 人參花膠鮑魚滋補養顏】五味真火、花膠園、湯譜、燉、椰小盅

湯水係一年四季嘅滋補恩物,想飲靚湯但又唔係成日得閒煲嘅話,一於試吓呢啲速飲嘅燉湯專賣店啦!今次精選五間燉湯店有主打速遞湯水嘅網店,亦有做堂食生意嘅實體門市,鍾意飲湯嘅你睇埋落去揀款靚湯飲啦!

 

1. 五味真火

五味真火係專做外賣燉湯(HKD43起)嘅網店,以WhatsApp落單。湯水以金、木、水、火、土分類,由潤喉到補氣血都有。想加錢配飯同餸變套餐(加HKD22)又得。而且啲湯會每月同每日轉款,包你日日食都有新鮮感。最近仲有夏日限定糖水(HKD38起),選擇多到暈!

佢哋會外觀塘、九龍灣、鰂魚涌、中環同灣仔五個地區,最遲每朝十點截當日訂單,然後即日12:00-14:00內送湯上門。睇七月有咩湯款之前提提大家,佢哋嘅金湯好受歡迎㗎,因為幾乎都加咗蟲草花!

 

五味真火
訂購電話:
觀塘/九龍灣/鰂魚涌:6600 6838
中環:6600 6836
灣仔:9160 1557

營業時間:星期一至五:08:00-18:00

 

2. 花膠園

花膠園主打花膠燉湯(HKD260起),有450ml同700ml可以揀。用料嚴選爽口彈牙又大塊嘅花膠,印尼海鱸魚膠做燉湯食材,而且佢哋嘅花膠仲有唔同等級俾你揀,想幾矜貴就幾矜貴。

佢哋有十一款花膠湯,仲分咗孕婦、復康、養生同護膚四類添。呢款椰子水南棗燉花膠湯(HKD260/450ml)用新鮮椰子水、南棗、桂園、杞子同分量十足嘅養顏花膠整成,補血益氣㗎。不過佢哋要時間浸發花膠,平日最少要24小時前預訂(已確認付款及訂單資料計算);如果紅日或公眾假期後,第一個上班日嘅訂單截單時間為48小時前。仲會喺營業時間內,你指定嘅時間90分鐘前或後內送去你指定嘅地方添。

 

花膠園
訂購電話:3705 3530
營業時間:星期一至五:11:00-19:00,星期六:11:00-14:00(星期日及公眾假期休息)

 

3. 椰小盅

喺太子嘅椰小盅聽個名都知主打用椰子燉湯,但佢哋特別在係選用原個越南老椰子連殼嚟燉湯!全店有7款湯,每款湯都有清甜嘅椰子香。其中一款長白山鮮人參燉烏雞椰小盅(HKD63)就用咗長白山人參嚟燉,參味幾突出;仲有生津止渴,安志定神嘅功效。加配埋用椰青水煮、內含四重穀物嘅椰小飯(HKD6),健康感即刻飆升!如果想買走,餐廳仲可以幫你抽真空保質添。

潷埋湯料出嚟,睇得出好足料,而且每款湯都可以變飯餐㗎。

 

椰小盅
地址:太子荔枝角道130號白楊街2A 號地下
電話:5202 1535
營業時間:星期一至五:12:00-23:00,星期六及星期日:12:00-22:30
圖片來源:giglio100

 

4. 燉

由藝人楊明有份開嘅喺荔枝角同炮台山都有門市,全店有14款即買即飲嘅燉湯。每盅湯燉足四個鐘,標榜毫無味精,絕對花足心機㗎。

呢款澳洲野生黑邊鮑魚燉雞(HKD78)用咗澳洲野生鮑魚,特別鮮甜彈牙,而且著重原味連鹽都冇加!

最近除咗去門市堂食之外,啱啱開始提供港九新界外送服務。只要星期一至六嘅14:00前WhatsApp 落單,就可以喺第二日自選嘅營業時間內送湯上門(離島除外)。

 


地址:荔枝角長義街10號昌隆工業大廈地下3A2號舖
電話:2816 1411 (WhatsApp訂餐:6033 3228)
營業時間:星期一至五:11:00-21:30,星期六、日:12:00-21:30
圖片來源:ipykh

 

5. 湯譜

介紹咗兩間外賣燉湯,依家睇返啲安坐餐廳飲靚湯嘅選擇先。呢間喺中環嘅湯譜Soupday雖然賣中式湯,但裝修走西式風格;牆上嘅餐牌都係用英文介紹,照顧埋外國人添。

呢度嘅燉湯款式幾創新,會用鮮奶、黑蒜、桃膠呢啲食材燉湯。呢款黑蒜螺頭燉湯(HKD58)有原粒黑蒜喺入面,熬足三至四個鐘,濃郁嘅黑蒜味又夾到螺頭嘅鮮味喎,而且螺頭燉到好腍可以食埋;仲放咗唔少桂圓同瘦肉去,味道更加甜同滋補養生㗎。

 

湯譜Soupday
地址:中環善慶街5號
電話:6386 4688
營業時間:星期一至日:12:00-21:30

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *