【營養師解剖五大冰品 100%水果棒健康度滿分】懶健康貼士

每個屋企嘅雪櫃到咗夏天一定有雪糕、雪葩或者雪條呢類冰品。雖然食得多凍嘢對身體唔好,但真係熱到好難頂,惟有揀質素好啲嘅冰品啦。註冊營養師Moses比較咗市面唔同製法嘅冰品,話你知邊種製作方法健康啲!

 

傳統美式雪糕(American Style Ice Cream) | 健康程度: 1 星

傳統美式雪糕嘅基本材料係奶油、牛奶同糖。呢啲係製造雪糕好重要嘅材料,因為牛奶同奶油嘅脂肪可以穩定雪糕嘅結構,令雪糕更加香甜同滑身。不過同時亦增加唔少熱量,而且奶油同牛油屬飽和脂肪,攝取過多會增加患心血管疾病嘅風險。

建議:

  • 買之前先睇營養標籤,盡量選擇較低脂或少糖嘅牌子。
  • 食迷你版雪糕控制分量,例如Dreyer’s Collection Mini一枝約137卡路里。

 

乳酪雪糕 (Frozen Yogurt Ice Cream) | 健康程度: 2 星

雖然聽落去乳酪雪糕好似比傳統雪糕健康,但唔好跌入呢個陷阱呀!因為乳酪雪糕用較多脫脂奶品,所以總脂肪比傳統雪糕較低,但係糖份會偏高,屬高糖食物。以一茶匙5克糖計算,每100毫升裡面已經有高達4茶匙糖份,導致熱量都偏高㗎。

 

雪葩 (Sorbet) | 健康程度: 3 星 (視乎用料)

雪葩係將新鮮水果冷藏至結冰後磨成沙冰,因為冇牛奶成分,所以脂肪含量亦較少。不過亦因為少咗脂肪,所以一般會加糖幫助雪葩成形, 亦係雪葩熱量嘅主要來源。

建議:

  • 每次食1-2球。
  • 自家製作可以控制落幾多糖。

 

冰棒 (Popsicle) | 健康程度: 3星 (視乎用料)

冰棒通常用果汁或濃縮果汁冷藏製成,所以一般都屬低脂食品。熱量來自果汁裡面嘅果糖,製造商亦會添加額外糖份。不過最好睇埋成分表有冇加入色素同添加劑令冰棒更加著色,即使符合安全標準,食得多都係冇益嘅。

建議:

  • 自家製作,用100%果汁或新鮮水果果蓉代替濃縮果汁,亦幫助攝取纖維同減少添加糖。
  • 買之前先睇營養標籤,選擇少糖嘅牌子。

 

100%水果棒 (Fruit sticks) | 健康程度:5星

100%水果棒直接將水果冷藏,變成水果條,熱量同營養素同新鮮水果相約,所以係最健康嘅冰品。好似呢款水果棒 1枝大約有55千卡,以卡路里嚟計算,4枝芒果棒先大約等於1小杯傳統雪糕,抵食之餘,可以補充水果攝取不足嘅情況。不過記住買唔同牌子嘅水果棒之前,都睇標籤成分確保係100%水果,冇添加其他成分。

建議:

  • 以士多啤梨、香蕉、菠蘿等新鮮水果自家製作。
  • 健康都唔好超標,食呢種會計算為食水果,建議每日食大約兩份水果。

 

Moses Lee

現為“My Fitness”註冊營養師、澳洲營養及飲食治療碩士同澳洲營養師協會會員,擅長體重管理同運動營養。曾於醫院、社區中心、教會同非牟利機構等地方提供營養服務、舉辦營養講座同烹飪示範。依家為有需要控制體重嘅人士同運動員提供營養治療,制定飲食方案。

圖片來源:thetasteofcolour、elaine__fung

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *