【將軍澳街市抵食三餸下午茶 即炒彈牙意粉炸物夠香脆】平霸

喺將軍澳調景嶺嘅彩明街市入面竟然有得食西餐喎,餐廳名仲叫平靚正西餐。呢度主打親民價嘅即炒意粉,仲俾平霸發現有個幾抵食嘅自選下午茶套餐添。究竟有幾「平靚正」?睇埋落去啦!

喺街市嘅食肆舖面都難免比較細,呢度一邊係堂食區,有十幾個座位,而另一邊就係開放式廚房。除咗堂食之外,都見到唔少街坊喺度買外賣攞走。

每日14:30-18:00供應嘅自選下午茶套餐(HKD32)劃一收費,A區可以揀一款,主要係即炒意粉,亦有熱狗同蛋餅;而B區嘅小食類就可以再揀兩款;最後喺C區揀埋飲品就得喇。值得一提嘅係凍飲都唔使加錢,仲有埋特色飲品添。

今次嗌咗卡邦尼煙肉扁意粉蜂蜜柚子雞翼宜蘭三星蔥餡餅凍水蜜桃綠茶。成set賣相精緻,望落幾豐富;分量就唔算特別大份,同平時啲下午茶差唔多,但勝在食物可以隨意配搭,有得試吓唔同食物,夠晒滿足呀。

茶餐嘅意粉係細size,分量都唔少,tea time食都幾飽肚。呢個卡邦尼煙肉扁意粉係即叫即炒嘅,賣相吸引。煙肉、洋蔥等配料都落唔少,意粉汁又夠濃稠,有掛汁效果,入口幾creamy。意粉質地偏硬身,食落有韌度,高質喎!

蜂蜜柚子雞翼就最有驚喜!大隻多肉嘅雞翼面頭雖然沾咗蜂蜜柚子醬,但外皮仲係卜卜脆,柚子味都幾重,食落酸酸甜甜咁幾開胃。

而另一款小食宜蘭三星蔥餡餅表面煎得香脆,入面啲餡仲幾多添,一咬開就有好香嘅蔥味。而且呢個係mini size,食完唔會太膩。

再嗌埋另一款試試佢先!呢個set就有意式肉醬扁意粉黑松露炸薯角炸魚柳凍香濃朱古力。一睇啲意粉咁橙紅色就知嗦晒超濃嘅蕃茄味,不過肉醬就唔係好多。

呢度啲炸物上枱嗰陣全部都熱辣辣,好香脆。呢款黑松露炸薯角係普通炸薯角,再落啲黑松露同沙律醬喺旁邊俾你蘸。

炸魚柳就薄薄哋,但炸得香脆肉嫩。不過三十蚊左右嘅下午茶有咁多款食物配搭,仲幾高質素,依家真係唔係度度都有,整體上已經好滿意喇。

 

平靚正西餐
地址:將軍澳調景嶺彩明街1號彩明商場一期1樓彩明街市16號舖
電話:3686 0078
營業時間:星期一至日:11:00-19:15

You may also like...

Leave a Reply

Your email address will not be published. Required fields are marked *