【Fusion越式三文治新品率先睇 8月首推四川紅燒牛肉】Le Petit Saigon

以為越式三文治來來去去都係差唔多味?咁諗就錯喇!呢間喺灣仔嘅越式三文治外賣店Le Petit Saigon由依家至十二月,每個月會聯同其他餐廳大玩crossover,輪住推出六款每月限定特色越南三文治,fusion台、中、泰、日口味,就連偏門啲嘅旁遮普菜式都有,新鮮感十足!依家小編帶大家率先睇吓其中四款三文治新品啦!

呢間越式三文治外賣店單睇個樣已經充滿越南風情,一入到就望到個放滿法包同各式配料嘅食物櫃。全部三文治都係即叫即整,連法包都係嗌嘅時候先烘熱,保證你拎上手都仲新鮮暖笠笠。雖然呢度主要做外賣生意,但都好貼心咁放咗幾張高腳椅俾大家坐低速食。依家睇吓佢哋嘅出品啦!

嚟緊八月限定嘅越南三文治就係佢喇!呢款中式四川口味越南三文治(HKD88)係由粵菜餐廳口利福主廚Kelvin Ng設計,靈感來自於四川名菜「夫妻肺片」,入面夾咗紅燒牛肋骨同牛舌,牛肉味都幾重;牛肋骨肉嘅軟腍再加上牛舌嘅爽口,有雙重口感添。配埋雲南青辣椒、焦糖洋蔥等等,食落非常惹味!

當越南三文治遇上日式吉列豬扒又會擦出咩火花呢?九月登場嘅日式越南三文治(HKD88)由超人氣居酒屋Fukuro主廚Shun Sato合作推出,以Fukuro自家製嘅吉列豬扒做主角!吉列脆皮厚度適中,肉質鮮嫩;配上酸甜帶微辣嘅惹味豬扒醬同和風芥末醬,外脆內軟好滋味。

而十月份就輪到旁遮普式越南三文治(HKD88),用上米芝蓮星級旁遮普菜餐廳New Punjab Club出名嘅泥窖烤雞入饌,加入多款香料調製成嘅沙律、乳酪、羅望子醬等印巴菜特有嘅配料,香料味特別濃郁,都幾辣吓㗎,重口味人士必食呀!

十一月份同BELON聯乘嘅三文治款式係隠藏版,依家賣個關子先,睇住十二月嘅泰式越南三文治(HKD88)啦!由泰菜餐廳Soul Food Thai主廚Noom設計嘅款式係以咖喱手撕牛肋骨做主角,而一條條脆卜卜嘅就係炸泰北金麵,再加入涼拌西瓜,成個三文治辣中帶甜,層次夠晒豐富呀!

同場加映長青嘅經典越式三文治(HKD88),係舖頭熱賣招牌款式嚟㗎。餡料有獨家秘製嘅豬頭肉凍、醃菜、越南辣椒、青瓜等等,咁多蔬菜令入口感覺清新。食住咁地道傳統嘅越式三文治,差啲以為自己去咗越南添呀。

介紹咗咁多款特色越南三文治,全部都啖啖肉,依家就介紹返一款素食越南三文治(HKD88)啦。中間夾住炸到金黃香脆嘅炸豆腐,外皮香脆入面滑嫩,味道唔會太淡口,亦唔覺膩,可以同素食友一齊嚟喇。

 

Le Petit Saigon
地址:灣仔永豐街16號地舖
電話:2455 2499
營業時間:星期一至日:11:30-21:00

You may also like...

Leave a Reply

Your email address will not be published. Required fields are marked *