【海鮮主題自助餐平食2款生蠔 爆膏龍蝦+得獎拿破崙】8度餐廳

土瓜灣8度海逸酒店旗下嘅8度餐廳自助餐一向出名性價比高,而今個夏天嘅全新主題係「夏日海鮮狂熱自助晚餐」,當然唔少得任食即開生蠔、波士頓龍蝦、皇后蟹腳等高質海鮮冷盤;熱盤就有煲仔白酒煮藍青口、香煎鵝肝、清甜燉湯呢啲即煮高質菜式都係任食㗎。除咗主菜,呢度啲甜品都係自助餐嘅重頭戲,即製榴槤班戟、Häagen-Dazs雪糕窩夫,連得獎嘅芒果拿破侖蛋糕都喺甜品吧任你攞,識飲識食嘅你一於去試吓啦!

呢度其中一個賣點梗係任食即開生蠔啦!而且每日會推出兩款生蠔,唔只得一個品種,滿足晒大家嘅生蠔癮。小編當日嘅款式係American Pacific Rock同埋Irish Gigas Rock,前者海水味較淡,肉質爽口肥美,入口creamy;後者海水味同蠔味都重啲。

冷盤區仲放滿另外五款特色海鮮,分別有波士頓龍蝦皇后蟹腳海螺青口大蝦。全部都好新鮮靚仔,而且大家重點KO嘅龍蝦隻隻都勁多膏,蟹腳又啖啖肉夠鮮味。

食完啲生冷嘢一於拎碗燉湯飲暖吓胃。呢度嘅花膠北菇螺頭燉雞湯一出大家就排隊攞,因為每碗都有齊晒咁多樣材料,飲落清甜味濃,幾滋潤㗎。

旁邊就有廚師喺度即場煮青口,呢款意式煲仔白酒煮藍青口用咗白汁忌廉煮,再加入白酒調味,令到藍青口一食就有淡淡酒香又creamy。

即煎鵝肝油香十足,再放喺香脆嘅薄片法包上,淋埋黑松露汁;一啖一塊嘅松露鵝肝法包,鵝肝表面香脆,入口即融,正呀!

同場仲有啖啖肉嘅燒特級牛肉香草烤羊架、大大條清蒸海斑等熱門熟食菜式,多到不能盡錄囉。

嚟到萬眾期待嘅甜品區喇!首先要介紹嘅係兩款即製甜品:榴槤班戟Häagen-Dazs雪糕窩夫。呢度嘅榴槤班戟連班戟皮都係即製,再加入鮮榴槤肉同忌廉,各位榴槤控可以食幾多都得。而雪糕窩夫就喺即整嘅熱辣辣窩夫上面,放上兩球Häagen-Dazs期間限定口味嘅雪糕。

另外,皇牌芒果拿破崙當然係呢度嘅必食之選啦:佢用咗香甜嘅呂宋芒嚟整,酥皮夠鬆脆又有牛油香,入面啲吉士忌廉仲係秘製㗎。呢個蛋糕好食到攞過「香港國際美食大獎2015」嘅烘焙大獎,嚟到要食多幾件!

呢度嘅高質蛋糕同甜品勁多款,記得留肚呀!

 

「夏日海鮮狂熱自助晚餐」
供應時間:即日起至9月30日:18:00-23:00
價錢:
星期一至四:HKD478/成人、HKD408/長者、HKD338/小童(另收加一服務費)[e-shop購買可享8折優惠]
星期五至日:HKD508/成人、HKD458/長者、HKD388/小童(另收加一服務費)[e-shop購買可享85折優惠]
*加一服務費按原價計算

 

8度餐廳
地址:香港九龍土瓜灣九龍城道199號酒店大堂
電話:2126 1960
營業時間:星期一至日:06:30-23:00

You may also like...

Leave a Reply

Your email address will not be published. Required fields are marked *