【K11 MUSEA開幕雲集首次過江美食 文華雞飯+韓國魚糕搶先開】K11 MUSEA

K11 MUSEA終於正式開幕喇!呢個樓高十層嘅尖沙咀新商場可以話係最熱門嘅美食集中地,當中有日、韓、英、法、新加坡等地嘅人氣餐廳首次嚟香港開海外店添。大部分都將會喺9、10月同大家見面,亦有幾間喺8月率先開業,即刻睇吓啦!

 

多間國際過江龍首度襲港

文華海南雞飯Chatterbox Café

想食馳名嘅文華海南雞飯,依家唔使飛去新加坡,過幾日喺香港都食到喇!新加坡文華酒店旗下嘅Chatterbox Café喺K11 MUSEA嘅新店即將開業,呢度主打一系列新加坡地道菜式,最經典嘅就梗係佢哋嘅文華海南雞飯啦,仲有原個椰子雪糕都好吸引㗎。

開業日期:9月6日 (B110號舖)

 

韓國魚糕專賣店「三進魚糕」

韓國熱門嘅街頭小食之一,魚糕都同樣打入呢度。呢間三進魚糕可以話係創造咗魚糕嘅全新境界!入面賣超過60款唔同嘅魚糕食品,除咗有傳統嘅魚糕串之外,仲有包咗餡嘅魚糕球、魚糕炸物等等,快啲去K11 MUSEA試勻佢哋啦!

開業日期:已開業

 

韓國人氣麵包店Tardemah

呢間Tardemah係超有人氣嘅韓國麵包烘焙店,賣好多唔同種類嘅手工麵包。佢哋嘅爆餡芝士包、Oreo忌廉包、韓國年糕包等等都好有特色,有唔少來自世界各地嘅捧場客㗎,唔知香港店會唔會好似韓國店咁大排長龍呢?

開業日期:9月10日

 

牛油果主題餐廳Avobar

來自倫敦嘅人氣牛油果餐廳Avobar開咗短短一年就迅速冒起,嚟緊9月中就會喺呢個新商場開香港首間分店,仲係佢哋第一間海外店添。話明以牛油果做主題,呢間餐廳由鹹食、甜點到飲品,幾乎全部都加入牛油果元素。其中牛油果漢堡、流心蛋牛油果多士、牛油果果昔等等都係呢度嘅招牌菜,一眾牛油果控記得去朝聖喇!

開業日期:9月16日 (B201號舖)

 

東京拉麵人龍店「多賀野」

同樣喺香港開設首間海外分店嘅多賀野依家已經開始試業喇。香港分店嘅食材都由日本直送,舖頭亦自設製麵工場自家製拉麵。熱賣嘅鴨肉沾麵、粟國鹽味拉麵等招牌菜喺呢度都食到㗎。

開業日期:試業中 (220號舖)

 

法國烘焙麵包店Gontran Cherrier

Gontran Cherrier嘅出品被譽為「巴黎最好食牛角包」,都會喺9月進駐K11 MUSEA。呢度嘅招牌牛角包當然係必食之選,仲有唔少口味嘅包餡牛角包俾你揀。之前法國國慶佢哋仲出咗期間家限定嘅三色國旗牛角包添,唔知香港又會唔會有啲咩限定款式食到呢?

開業日期:預計9月中 (B205-B207號舖)

 

東京咖啡店Koffee Mameya

想喺K11 MUSEA歎返杯靚咖啡?非呢間東京過江龍莫屬啦。咖啡迷必去嘅Koffee Mameya總店喺東京表參道,售賣世界各地嘅咖啡豆以及一啲手沖咖啡,職員會詳細向客人介紹唔同嘅咖啡添。對咖啡有要求嘅朋友一定要去試吓呀!

開業日期:待定 (B217、B219號舖)

 

Afternoon Tea TEAROOM

來自日本生活品牌嘅Afternoon Tea TEAROOM連同佢哋嘅cafe一齊嚟到香港喇。Cafe所賣嘅日式甜品、芭菲大多採用時令水果,例如士多啤梨、蜜桃等等,不時仲會推出期間限定甜品添。唔知到時又會唔會推出一啲新款式係香港限定嘅呢?

開業日期:預計9月 (B112B號舖)

 

英國精品及餐廳品牌Fortnum & Mason

呢間連英國皇室都成日去嘅Fortnum & Mason歷史相當悠久,店舖同產品都以標誌性嘅Tiffany Blue為主調。店內主打英式精品同茶品等美食,第一間海外分店就喺香港落戶喇。佔地兩層嘅香港新店有餐廳同精品店,當然仲買到佢哋經典嘅Fortnum Tea啦!

開業日期:待定 (022、122號舖)

 

其他人氣熱店登陸新場

幸福班戟

早前喺銅鑼灣非常有人氣嘅幸福班戟,終於過海開到嚟尖沙咀K11 MUSEA喇!佢哋嘅班戟每個都至少有4cm厚度,口感鬆軟綿密,仲有唔同口味選擇。佢哋最近新推出期間限定嘅白桃玫瑰果班戟,仲唔快啲去試?!

開業日期:現正開業 (233A號舖)

 

Five Guys

相信大家對Five Guys都唔會陌生,上年11月喺灣仔開咗首間香港分店,掀起一輪美式漢堡熱潮之後,依家又準備進軍尖沙咀喇。佢哋喺香港嘅menu同美國嘅一樣,充滿美式風味,食完漢堡記得飲埋佢嘅招牌奶昔呀!

開業日期:待定 (301B-302號舖)

 

陳豪主理咖啡店Blooms Roastery & Craft Bar

藝人陳豪鍾意咖啡鍾意到自己成立一個咖啡店品牌Blooms Roastery & Craft Bar,除咗喺荃灣有自家烘焙工場、網店同Pop Up Store之外,依家擴展到喺K11 MUSEA開實體門市喇!咖啡店由陳豪親自主理,聽講佢仲會不時親身落舖打點添,想飲到佢親手沖嘅咖啡就要多啲去踫吓運氣喇!

開業日期:現正開業 (221號舖)

 

K11 MUSEA
地址:尖沙咀梳士巴利道18號
電話:3892 3890
營業時間:星期一至日:10:00-22:00

You may also like...

Leave a Reply

Your email address will not be published. Required fields are marked *