【三大日本過江龍天婦羅丼飯 金子半之助質勝天丼抵食】金子半之助、天吉屋、天丼

日本過江龍天婦羅丼飯次次登陸香港都牽起陣熱潮,近排唔少朋友仲問小編金子半之助、天吉屋同天丼邊間好食啲,所以即管嚟個大比拼啦!以5星為滿分,睇吓脆漿、天婦羅款式、CP值同變化度四方面,佢哋邊間跑出先。

 

金子半之助

江戶前天丼

金子半之助現時只有三款丼飯,而每款丼都有六款天婦羅。包括2隻鳳尾蝦、以墨魚粒同干貝製成嘅雜錦海鮮餅溫泉蛋海苔小青龍(荷蘭豆),最後一款先會唔同。呢碗招牌嘅江戶前天丼(HKD138)就配咗25cm超長穴子魚天婦羅,視覺夠晒震撼之餘都幾飽。天婦羅外脆內嫩,juicy又夠水分,唔會好快就軟腍腍。醬汁方面鹹甜度適中,而天婦羅用高純度芝麻油炸會加咗味,基本唔使再落醬汁。加上佢哋用咗特別嘅丼碗保溫,食到咁上下啲飯都仲暖。而解膩小菜都好有驚喜,因為一般嗁漬物都好酸,但呢度嘅漬牛蒡好清甜;海帶伴薑就相對酸辣啲,但有一淡一重味嘅選擇幾貼心。

 

脆漿:★★★★☆

天婦羅款式:★★★☆☆

CP值:★★★★☆

變化度:★★☆☆☆

總分:13星(總分20星)

 

金子半之助
地址:葵涌興芳路223號新都會商場1樓107-108號舖
電話:2661 8212
營業時間:星期一至日:11:30-22:30

 

天吉屋

軟穀蟹丼

天吉屋嘅前菜沙律可以無限添加,五款丼之中嘅天婦羅都會有啲唔同,最多嗰碗有十款㗎。香港限定軟殼蟹丼(HKD158)嘅軟殼蟹都幾多,有5、6嚿,都算大件啖啖肉;仲有用皇帝菜同櫻花蝦整成嘅什錦炸物、茄子、南瓜同溫泉蛋做配料。如果想食飽啲,呢款落單嘅時候,可以追加白飯(加HKD15)。但係脆漿幾快腍,加上主角軟殼蟹肉本身都係軟腍,所以口感冇平時嘅天婦羅咁脆口,會有啲油膩感;不過佢其他丼之中嘅黑虎蝦肉質好爽口彈牙,三間之中佢嘅蝦最出色。醬汁本身鹹少少,可能因為師傅淋得幾多,撈勻都可以唔使再加。不過其他丼飯之中,天幕御膳(HKD148)可以有三個食法,例如變成茶漬飯;而天吉雙品(HKD108)仲可以一份有齊飯同烏冬,配搭變化會多啲。

 

脆漿:★★☆☆☆

天婦羅款式:★★★★☆

CP值:★★☆☆

變化度:★★★☆☆

總分:11星(總分20星)

 

天吉屋
地址:旺角朗豪坊11樓25-29號舖
電話:3105 0986
營業時間:星期一至日:00:00-22:30(22:00截單)

 

天丼

海老穴子天丼

天丼最平嗰款丼飯只係HKD49,當食個Tea都ok,所以真係冇得同佢鬥CP值。而且喺丼款、天婦羅款式同麵款都係三間過江龍入面最多,有時仲會推出期間限定添。呢款海老穴子天丼(HKD82)係呢度最貴同最天婦羅嘅丼飯,配咗黑虎蝦、長穴子、本菇、蟹柳、南瓜、四季豆同紫菜。佢嘅脆漿唔算厚,亦唔會勁快腍,但金子半之助嘅畫花會幼細啲,所以相比之下佢嘅穴子輸個馬鼻啦。佢嘅飯幾多吓,所以醬汁唔夠撈到落底;可以免費追加醬汁,但建議唔好加太多,如果唔係會鹹咗啲。

 

脆漿:★★★☆☆

天婦羅款式:★★★★☆

CP值:★★★★★

變化度:★★★☆☆

總分:15星(總分20星)

 

天丼
地址:青衣青敬路33號青衣城地下G02號舖
電話:3425 4098
營業時間:星期一至日及公眾假期:12:00-22:00

 

總括嚟講,三間過江天婦羅丼飯店各有長處,但單純睇成個丼嘅質素,金子半之助略勝一籌,值得一試;如果就CP值就揀天丼啦;想一餐飯多變化啲係天吉屋喇。

You may also like...

Leave a Reply

Your email address will not be published. Required fields are marked *